समाचार सारांश
- नेपालगञ्ज–१२ कोरियनपुरमा जलेको अवस्थामा भेटिएकी २२ वर्षीया सिर्जना बुढा मगरको उपचारका क्रममा मृत्यु भएको छ।
- घटनामा संलग्न आशंकामा तीन जनालाई प्रहरीले पक्राउ गरी अनुसन्धान अघि बढाएको छ।
- प्रारम्भिक अनुसन्धानमा व्यक्तिगत सम्बन्धको विषय समेत जोडिएको हुनसक्ने देखिएको छ।
नेपालगञ्ज : बाँकेको नेपालगञ्जमा जलेको अवस्थामा फेला परेकी युवतीको उपचारका क्रममा मृत्यु भएको छ । सो घटनामा तीन जना पक्राउ परेका छन् ।
जिल्ला प्रहरी कार्यालय बाँकेका प्रमुख प्रहरी उपरीक्षक अंगुर जिसीका अनुसार नेपालगञ्ज उपमहानगरपालिका वडा नम्बर १२ कोरियनपुरमा गएराति एक युवती आगोले जलेको अवस्थामा भेटिएको र उपचारका लागि अस्पतालमा लगेपछि मृत्यु भएको थियो ।
मृतक युवतीको पहिचान खुलेको प्रहरी उपरीक्षक जिसीले जानकारी दिए । जलेको अवस्थामा भेटिएकी युवती नेपालगञ्ज १२ कोरियनपुरकै २२ वर्षीया सिर्जना बुढा मगर भएको उनले बताए ।
प्रहरीका अनुसार गएराति करिब १२ बजेको समयमा नेपालगञ्ज १२ कोरियनपुरस्थित भेरी प्राविधिक शिक्षालय नजिकै एक युवती आगोले जलेर घाइते बनेको अवस्थमा फेला पारी उपचारका लागि तत्काल भेरी अस्पताल पु¥याइएको र उपचारकै क्रममा ती युवतीको मृत्यु भएको थियो ।
मृतकका परिवारले तीन जनाको नाममा किटानी जाहेरी दिएको र उनीहरुलाई पक्राउ गरि अनुसन्धान सुरु गरिएको प्रहरी उपरिक्षक जिसीले बताए । उनका अनुसार प्रहरीको प्रारम्भिक अनुसन्धानमा ती युवतीको पहिले नै अन्य व्यक्तिसँग विवाह भएको र ३–४ वर्षकी एक छोरी पनि रहेकी थिइन् । हाल आरोपीमध्येका एक जनासँग युवतीको सम्बन्ध रहेको बुझिएको पनि उनले जानकारी दिए ।
पक्राउ परेकाबाहेक पनि अन्य व्यक्तिको संलग्नताका बारेमा थप अनुसन्धान भइरहेको तथा के कसरी घटना घट्यो भन्ने बारेमा प्रहरीले थप अनुसन्धान गरिरहेको उनको भनाइ छ । मृतक युवतीको शव भेरी अस्पतालमै राखिएको प्रहरीले जनाएको छ ।
