समाचार सारांश
- फागुन २१ मा भएको प्रतिनिधिसभा निर्वाचनमा बाँकेका ५६ उम्मेदवारमध्ये ४५ जनाले मात्रै खर्च विवरण बुझाएका छन्।
- कानुनअनुसार परिणाम घोषणा भएको एक महिनाभित्र विवरण बुझाउनुपर्ने भए पनि अझै ११ जनाले बुझाउन बाँकी छ।
- चैत २३ गतेसम्म समयसीमा रहेकाले बाँकी उम्मेदवारले पनि समयमै विवरण बुझाउने अपेक्षा गरिएको छ।
नेपालगञ्ज, : फागुन २१ मा सम्पन्न प्रतिनिधिसभा सदस्य निर्वाचनमा बाँके जिल्लाका तीनवटै निर्वाचन क्षेत्रबाट उम्मेदवार बनेका ५६ जनामध्ये ४५ जनाले निर्वाचन खर्च विवरण बुझाएका छन् ।
जिल्ला निर्वाचन कार्यालय बाँकेका अनुसार निर्वाचनमा ५६ जनाले उम्मेदवारी दर्ता गराएकोमा हालसम्म ४५ जनाले मात्र खर्च विवरण कार्यालयमा बुझाएका हुन् ।
जिल्ला निर्वाचन कार्यालय बाँकेका सूचना अधिकारी युवराज पन्तले निर्वाचन परिणाम घोषणा भएको एक महिनाभित्र सबै उम्मेदवारले खर्च विवरण बुझाउनुपर्ने प्रावधान रहेको जानकारी दिए । उनका अनुसार हालसम्म ४५ जनाले खर्च विवरण सार्वजनिक गर्दै कार्यालयमा पेस गरेका छन् ।
बाँकेको निर्वाचन परिणाम फागुन २३ गते घोषणा गरिएकाले चैत २३ गतेभित्र खर्च विवरण बुझाइसक्नुपर्ने समयसीमा रहेको छ । कार्यालयका अनुसार ११ जना उम्मेदवारले अझै विवरण बुझाउन बाँकी छ ।
चैत २३ गते आउन अझै केही दिन बाँकी रहेकाले समयसीमा भित्रै सबै उम्मेदवारले खर्च विवरण बुझाउने आशा गरिएको सूचना अधिकारी पन्तले बताए । उनले विवरण बुझाउन बाँकी रहेका उम्मेदवारलाई तत्काल प्रक्रिया पूरा गर्न समेत अनुरोध गरेका छन ।
बाँके जिल्लाको क्षेत्र नम्बर १ बाट राष्ट्रिय स्वतन्त्र पार्टीका सुरेशकुमार चौधरी, क्षेत्र नम्बर २ बाट नेकपा (एमाले) का मोहम्मद इश्तियाक राई र क्षेत्र नम्बर ३ बाट राष्ट्रिय स्वतन्त्र पार्टीकै खगेन्द्र सुनार विजयी भएका छन् ।
