नेपालगञ्ज : नेपालगञ्जमा तिहरको अवसरमा किनमेलका लागि तिहार बजार सञ्चालनमा ल्याईएको छ । नेपालगञ्जको त्रिभुवन चोकदेखि त्रिवेणी मोडसम्मको बाटोमा तिहार बजारको रुपमा पसलहरु सञ्चालनमा ल्याईएको हो ।
हिन्दू समुदायको दोस्रो ठूलो पर्व तिहार अर्थात आज यमपञ्चकको पहिलो दिन धनतेरस भनिने र धनतेरसका दिनमा घरभित्र कुचो, धनिया, भाँडाकुँडा, सुन, चाँदी लगायतका वस्तुहरु खरिद गर्दा लक्ष्मीको बास घरमा हुने र सधै धनकी देवी लक्ष्मीको आफूमाथि कृपा रहने विश्वास अनुसार यी सामानहरु खरिद गर्ने चलन रहेको छ ।
लक्ष्मीपूजाको दिनमा दिपावली गर्दा आज यमपञ्चक पहिलो दिन अर्थात धनतेरसको दिनमा खरिद गरेको सरसामानमा राखेर पूजा गर्ने चलन रहेको छ । सोही चलन अनुसार आज नेपालगञ्जमा सञ्चालनमा ल्याईएको तिहार बजारमा कुचो, धनियाँ भाँडाकुँडा तथा सूनचाँदी खरिद गर्नेको घुईचो लागेको छ ।
तिहारको अवसरमा पसलहरु पनि बाटो मिचेरै सञ्चालनमा ल्याईएको छ । नेपालगञ्जमा रहेका भाँडा पसलहरुमा धनतेरसका लागि भाँडाकुँडा खरिद गर्नेको भिड लाग्ने गरेको धम्बोझीचोकमा रहेको नेपाल स्टोरका सञ्चालक जाकिर हल्वाईले जानकारी दिए । उनले दिपावली पूजाको लागि आवश्यक पर्ने सबै प्रकारका भाँडाको भेराईटी आफुकहाँ हुने भएकोले पनि भिड रहने गरेको दाबी गरे ।
