नेपालगञ्ज : बाँके प्रहरीले लागुऔषध कारोबारीलाई नियन्त्रणमा लिने क्रममा शुक्रबार दिउसो एक राउण्ड गोली चलाएको छ ।
विशेष सूचनाका आधारमा लागुऔषधको कारोबार भइरहेको सूचना पाए लगत्तै जिल्ला प्रहरी कार्यालय बाँके र लागुऔषध नियन्त्रण ब्यूरो नेपालगञ्जबाट खटिगएको टोलीले नेपालगञ्ज–४ बसपार्क नजिकै भारतीय नागरिकलाई प्रतिवन्धित लागुऔषध ब्राउनसुगरसहित गोली हानी नियन्त्रणमा लिएको हो ।
बाँके प्रहरी प्रवक्ता समेत रहेका प्रहरी नायव उपरिक्षक दिपक पातलीले दिएको जानकारी अनुसार शुक्रबार दिउसो साढे १२ बजेतिर संयुक्त टोलीले नेपालगञ्ज–४ बसपार्क पूर्वतिर लागुऔषध कारोबारीलाई नियन्त्रणमा लिने क्रममा कारोबारीहरुले प्रहरी माथी आक्रमणको प्रयास गरेपछि एकराउण्ड गोली प्रहार गरी भारत बहराईचका २० वर्षिय कार्तिक कुमार र अजय कुमारलाई १ सय ११ ग्राम ब्राउन सुगरसहित नियन्त्रणमा लिन सफल भएको हो ।
प्रहरीले चलाएको गोली कार्तिक कुमारको दाहिने खुट्टाको पिडुलामा लागेको र घाइते कार्तिकको नेपालगञ्ज नर्सिङ्गहोम ( संजिवनी अस्पताल नेपालगञ्ज) मा उपचार भईरहेको प्रहरीले जनाएको छ ।
यसैगरी प्रहरीले नेपालगञ्ज–४ बसपार्कबाटै ५४ ग्राम ब्राउनसुगर सहित नेपालगञ्ज–५ का २५ वर्षिय फैजान अन्सारी र २२ वर्षिय असफाक शाहलाई नियन्त्रणमा लिन सफल भएको प्रहरी नायव उपरिक्षक पातलिले जानकारी दिए ।
बाँके प्रहरीले सोही टोलीले बिहीबार साँझ नेपालगञ्जको एकलैनी बजार नजिकैबाट दाङ्ग तुलसिपुर–६ का २८ वर्षिय बीरबहादुर बिकलाई ४७ ग्राम ७१० मिलिग्राम ब्राउन सुगरसहित नियन्त्रणमा लिन सफल भएको छ । बाँके प्रहरीले लागू औषध बिरुद्धको अभियान तीब्र पारेको जनाएको छ ।
