नवलपुर : नवलपुरको देचुली–१७ पिप्रहरस्थित चितवन टाइगर रिसोर्टमा गत जेठ ३० गते राति आगोले जलेर घाइते भएकी कावासोती नगरपालिका–८ की बालिकाको उपचारको क्रममा काठमाडौँमा मृत्यु भएको छ ।
सो घटनामा परेर घाइते भएका ५ जना मध्ये एक बालिकाको उपचारको क्रममा मृत्यु भएको हो । आगोले पोलेर एकै परिवारका तीनसहित पाँच जना घाइते भएका थिए ।
जिल्ला प्रहरी कार्यालय नवलपुरका प्रहरी नायब उपरीक्षक मधु नेपालका अनुसार कावासोती–८ निवासी ४४ वर्षिय प्रदीपकुमार भट्टराईकी छोरी ६ वर्षीया अन्नी भट्टराईको वर्न अस्पताल कीर्तिपुरमा उपचारको क्रममा मृत्यु भएको हो ।
सो घटनामा कावासोती–८ निवासी ४४ वर्षिय भट्टराई, उनकी श्रीमती ४१ वर्षिया मीना पौडेल, छोरी अन्नी, २६ वर्षिय असिम राना र २४ वर्षिय अनुप गुरुङ घाइते भएका थिए ।
भट्टराई कावासोतीको मध्यविन्दु बहुमुखी क्याम्पसका प्रध्यापक हुन । घाइते चार जनाको वर्न अस्पतालमै उपचार भइरहेको प्रहरी नायब उपरीक्षक नेपालले जानकारी दिए ।
रिसोर्टमा सेकुवा पोल्ने क्रममा पाँच जनालाई आगोले पोलेको थियो । उक्त घटनामा रिसोर्टको गम्भीर लापरबाही भएको पीडितको दाबी छ । घाइते भट्टराईले खाजा खाँदै गर्दा होटलका स्टाफले आगोमा पेट्रोल हालेकाले यस्तो घटना घटेको भिडियो सन्देशमार्फत बताएका छन् ।
जिल्ला प्रहरी कार्यालय नवलपुरका प्रहरी उपरीक्षक यादव ढकालले घटनाको अनुसन्धान भइरहे पनि घाइते निको भएर फर्किएपछि थप अनुसन्धानमा सहज हुने बताए ।
