कोहलपुर (बाँके) : बाँकेको कोहलपुरका चन्द्रवहादुर कामीको टाउको छिनाएर फरार आरोपित अनिल परियारलाई बाँकेको राप्तीसोनारीबाट प्रहरीले पक्राउ गरेको छ । बडादसैँको राति अनिलले कामीको टाउको छिनाएर सेफ्टीट्याङकिमा लुकाएर बेपत्ता भएका थिए ।
प्रहरीले रोल्पा जिल्ला माडी गाउपालिका वडा नं ६ बस्ने २४ वर्षीय अनिललाई चन्द्बहादुरको हत्या अभियोगमा पक्राउ गरिएको जनाएको छ ।
प्रहरीका अनुसार परियारलाई राप्तीसोनारी गाउँपालिका–१ भौवा नाकाको तिनघारी टोल दाँयातर्फ रहेको तिर्थमाली परियारको घर किनारमा रहेको शौचालयबाट मंगलबार बिहान ८ बजे पक्राउ गरिएको हो ।
इलाका प्रहरी कार्यालय कोहलपुर बाँकेबाट प्रहरी निरीक्षक राजकुमार भट्टको कमाण्डमा खटिईएको प्रहरी टोली र इप्रका कुसुम बाँकेबाट प्रहरी नायब निरीक्षक मोहनलाल वलीको कमाण्डमा खटिईएको प्रहरी टोलीले परियारलाई पक्राउ गरेको प्रहरीले जनाएको छ ।
मृतक कामीको टाउको घटनास्थलबाट करिव ५सयमिटर पूर्वउत्तरमा अनिलको दिदी नाता पर्ने सुनिता परियारको घरको सेफ्टीट्याङकिमा सोमबार बिहानमात्रै फेला परेको थियो ।
अनिल पाहुना पर्न सुनितामा आएको बताइएको छ । हत्याको कारण भने खुल्न नसकेको प्रहरीले जनाएको छ । कोहलपुर नगरपालिका–८ पिपिरी चोकदेखि करिव दुई किलोमिटर पूर्व शितलनगरमा हत्या गरिएको अवस्थामा शनिबार राति कामिको टाउको नभएको शव फेला परेको थियो ।
