दाङ : लुम्बिनी प्रदेशका मुख्यमन्त्री चेतनारायण आचार्यले विश्वासको मत पाएका छन । प्रदेश सभाको मंगलबारको बैठकमा मुख्यमन्त्री आचार्यले विश्वासको मत लिएका हुन ।
उनले राखेको विश्वासको मतको प्रस्तावको पक्षमा ७० सांसदले मत दिएका छन् । उनलाई नेकपा (एमाले) का २९, नेपाली कांग्रेसका २७, नागरिक उन्मुक्ति पार्टीका ४, जनता समाजवादी पार्टी (जसपा) २, जनता समाजवादी पार्टी नेपालका १, र लोकतान्त्रिक समाजवादी पार्टी (लोसपा) का ३ जनमत पार्टी ३ एक जना स्वतन्त्र सांसदले मत दिएका छन् ।
त्यस्तै, उनको विश्वासको मतको विपक्षमा ११ मत परेको छ । नेकपा माओवादी केन्द्रका ९, राष्ट्रिय जनमोर्चाका १ र नेकपा एकीकृत समाजबादी १ ले विपक्षमा मत हालेका छन् । आचार्य एमाले र कांग्रेसको समर्थनमा गएको साउन ७ गते मुख्यमन्त्री नियुक्त भएका हुन ।
केन्द्रमा नयाँ गठबन्धन बनेपछि नेकपा माओवादी केन्द्र संसदीय दलका नेता जोखबहादुर महराले मुख्यमन्त्रीबाट राजीनामा दिएका थिए । ८७ सदस्यीय प्रदेशसभामा बहुमतको लागि ४४ मत आवश्यक पर्छ । उनले ७० मत प्राप्त गरेका छन ।
