नेपालगञ्ज : शारीरिक अपाङता भएकी ३० वर्षीया महिलालाई बलात्कार गरेको आरोपमा कोहलपुर प्रहरीले एक जनालाई पक्राउ गरेको छ । कैलाली गोदावरी नगरपालिका वडा नं. ५ गेटा नहरटोल बस्ने ३९ वर्षीय गोबिन्द प्रसाद बोहोरालाई इलाका प्रहरी कार्यालय कोहलपुरले काठमाण्डौबाट पक्राउ गरेको हो ।
पीडित महिलाको अनुहारमा भएको दागको समस्या हटाउने औषधी आफुसँग भएकोले पूर्णरुपमा निको हुने र बिहे समेत गर्ने प्रलोभनामा पारी पटक–पटक जबरजस्ती करणी गर्ने बोहोरलाई पक्राउ गरिएको इलाका प्रहरी कार्यालय कोहलपुरले जनाएको छ ।
पीडित महिलालाई बाँकेको कोहलपुर नगरपालिका वडा नं. २ मनकामना चोकस्थित डेरा गरी पटक–पटक जबरजस्ती करणी गर्ने गरेको र उक्त कुरा कोही कसैलाई भनेमा झारफुक गरी भस्म गराइ दिने भनी डरत्रास समेत देखाउने बोहोरा घटना पश्चात् फरार रहेका थिए ।
पीडितको जाहेरीले आरोपित बोहोरालाई खोज तलासका लागि खटिएको प्रहरी टोलीले प्रहरी बृत्त स्वयम्भुको सहयोगमा पक्राउ गरी आवश्यक अनुसन्धानको प्रक्रिया आगाडी बढाइएको इलाका प्रहरी कार्यालय कोहलपुरका प्रमुख डिएसपी सुन्दर तिवारीले जानकारी दिए ।
