नेपालगञ्ज : बाँके प्रशासनले बजार अनुगमनलाई निरन्तरता दिँदै आएको छ । प्रशासनको नेतृत्वमा नेपालगञ्जका विभिन्न मिठाई पसलमा अनुगमन गरिएको हो ।
जिल्ला प्रशासन कार्यालय बाँकेका सहायक प्रमुख जिल्ला अधिकारी लालबहादुर गुरुङको नेतृत्वमा विभिन्न सरोकारवाला निकायको संयुक्त टोलीले नेपालगञ्जका विभिन्न मिठाई पसलहरुको अनुगमन गरेको बाँकेका प्रमुख जिल्ला अधिकारी श्रवणकुमार पोखरेलले जानकारी दिए । प्रजिअ पोखरेलका अनुसार अनुगमनका क्रममा उपभोक्ताको हितविपरीत सञ्चालित केही मिठाई पसललाई नगद जरिवानाका साथै मिठाईको उत्पादनमा समेत रोक्का गरी कारबाही गरिएको छ ।
राम मिष्ठान भण्डारको मिठाई उत्पादन गर्ने कारखाना असाध्यै फोहोर रहेको तथा बिल बिजक जारी नगरेको पाइएकाले ५ हजार रुपैयाँ जरिवाना गरिएको र सरसफाइको सुनिश्चितता नहुँदा सम्मका लागि मिठाई कारखानाको उत्पादन रोक्का गरिएको प्रजिअ पोखरेलले जानकारी दिए । उनका अनुसार बिक्री गर्न राखिएको मिठाईको शुद्धता परीक्षणका लागि नमुनासमेत सङ्कलन गरिएको छ ।
त्यसैगरी, श्याम मिष्ठान्न भण्डारले पनि सरसफाइ नगरेको तथा बिल बिजक जारी नगरेको पाइएकाले ५ हजार रुपैयाँ जरीवानाका साथै सरसफाइ सुनिश्चितता नहुँदासम्मका लागि मिठाई उत्पादन रोक्का गरी कारबाही गरिएको प्रजिअ पोखरेलले बताए । उक्त पसलबाट सडेगलेको तथा बिग्रेको अवस्थामा फेला परेको ५ किलो मिठाई नष्ट गरिएको र बिक्री गर्न राखिएको मिठाईको शुद्धता परीक्षणका लागि नमुना सङ्कलन गरिएको उनले जानकारी दिए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
मधुवन स्वीट पसलमा पनि सरसफाइ नगरेको तथा बिल बिजक जारी नगरेको पाइएकाले ५ हजार रुपियाँ जरिवानाका साथै सरसफाइ सुनिश्चितता नहुँदासम्मका लागि मिठाई उत्पादन रोक्का गरी कारबाही गरिएको प्रजिअ पोखरेलले बताए । उक्त पसलबाट बिक्री गर्न राखिएको मिठाईको शुद्धता परीक्षणका लागि नमुना सङ्कलन गरिएको उनले जानकारी दिए ।
त्यसैगरी लिटिल हङ्गर एण्ड स्वीट बेकरीबाट म्याद गुज्रेको अवस्थामा रहेको लिक्विड फ्लेवर दुई लिटर र कोकोनट पाउडर एक प्याकेट फेला पारी नष्ट गरिएको र बिक्री गर्न राखिएको मिठाईको शुद्धता परीक्षणका लागि नमुना सङ्कलन गरिएको प्रजिअ पोखरेलले जानकारी दिए ।
जिल्ला प्रशासन कार्यालय बाँकेका सहायक प्रजिअ लालबहादुर गुरुङ नेतृत्वको सरोकारवाला निकायको संयुक्त टोलीले दैनिकजसो नेपालगञ्जका विभिन्न पसलमा अनुगमन गर्नुका साथै कारबाही गर्दै आएको छ ।