नेपालगञ्ज : बाँकेको कोहलपुरमा निर्माण गरिएको भ्यू–टावर शुक्रबारदेखि सर्वसाधारणका लागि खुला गरिएको छ । कोहलपुरको गोलपार्कमा निर्माण गरिएको भ्यू–टावर परीक्षणकालका लागि नगरपालिका आफैँले सञ्चालन गर्नेगरी सर्वसाधारणका लागि खुला गरिएको हो ।
पाँच करोड ३५ लाख रुपैयाँमा निर्माण गरिएको भ्यू–टावर सञ्चालनका लागि पटक–पटक बोलपत्र आब्हान भए पनि निवेदन नपरेपछि नगरपालिका आफैले सञ्चालन गर्न लागेको हो ।
कोहलपुर नगरपालिकाका प्रमुख पूर्णप्रसाद आचार्यले भ्यू–टावर आन्तरिक र बाह्य पर्यटक कोहलपुर भित्र्याउन सहयोगी सिद्ध हुने बताए । उनले भने, ‘कोहलपुरको पर्यटन विकासका लागि यसबाट लाभ मिल्ने विश्वास लिएका छौं ।’
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
भ्यू–टावर प्रवेश शुल्क प्रतिव्यक्ति ७५ रुपैयाँ कायम गरिएको नगर प्रहरी प्रमुख वीरबहादुर थापाले जानकारी दिए । भ्यू–टावर सञ्चालनका लागि नगर प्रहरी परिचालन गरिएको छ । कोहलपुरमा व्यापार मेला सञ्चालन भइरहेका कारण प्रचार–प्रसारका लागि भ्यू–टावर खुला गरिएको थापाको भनाइ छ ।
निवर्तमान नगरप्रमुख लुटबहादुर रावतको पालामा गौरवको योजना मानेर भ्यू–टावर निर्माण भएको थियो ।