नेपालगञ्ज : शुक्रबार राति जाजरकोट केन्द्रबिन्दु बनाएर गएको भूकम्पमा परी घाइते भएकाहरूको प्रारम्भिक उपचारका लागि बाँकेका स्थानीय तहले औषधिसहित स्वास्थ्यकर्मीको टोली पठाएका छन् ।
खजुरा गाउँपालिकाले दुई लाख रुपैयाँको औषधिसहित स्वास्थ्य शाखा प्रमुख दीपक पौडेलको नेतृत्वमा शनिबार बिहान टोली जाजरकोट पठाएको गाउँपालिकाका अध्यक्ष डम्बरबहादुर विकले जानकारी दिए । अध्यक्ष विकले भने, ‘प्रभावितको ज्यान बचाउन स्वास्थ्यकर्मी पठाएका छौँ, अन्य सहयोग क्रमशः गर्नेछौँ ।’
नेपालगञ्ज उपमहानगरपालिकाका प्रमुख प्रशान्त विष्टले उद्धार तथा स्वास्थ्यकर्मीको टोली औषधिसहित पठाइएको बताए । घाइतेको ओसारपसारका लागि नेपालगन्ज उपमहानगरपालिकाले एम्बुलेन्स पनि उपलब्ध गराएको छ ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
यसैबिच जिल्ला बिपद व्यवस्थापन समितिको शनिबार बसेको बैठकले भूकम्पबाट भएको मानवीय र भौतिक क्षतिलाई मध्यनजर गरी आवश्यक प्रतिकार्यका लागि सम्पूर्ण संयन्त्रलाई क्रियाशील राख्ने निर्णय गरेको छ ।
बैठकमा नेपालगञ्ज उपमहानगरपालिका, कोहलपुर नगररपालिका, राप्तीसोनारी गाउँपालिका र खजुरा गाउँपालिका, नेपाल रेडक्रस सोसाइटीलगायतले स्वास्थ्यकर्मी तथा औषधि र अन्य सामग्री सहयोग गर्ने प्रतिबद्धता जनाएका छन् ।
बाँकेका प्रमुख जिल्ला अधिकारी श्रवणकुमार पोखरेलका अनुसार नेपालगन्जको भेरी अस्पताललाई भूकम्पमा परेका घाइतेहरूको उपचारका लागि व्यवस्था मिलाइएको छ । शिक्षण अस्पताल र अन्य अस्पताल पनि तयारी अवस्थामा राखिएको छ । प्रमुख जिल्ला अधिकारी पोखरेल सहितका सुरक्षा अधिकारी, नेपालगञ्ज उपमहानगरपालिकाकाभेरी अस्पतालमा कार्यरत अधिकांश चिकित्सक, स्वास्थ्यकर्मी सहितको टोली परिचालन भएको छ ।