नेपालगञ्ज : बर्दिया जिल्लामा ३ अर्ब ९६ करोड लगानीमा सेरामिक उद्योग खुल्दै छ । गुलरिया नगरपालिका–८ मा उद्योग स्थापना गर्ने गरी उद्योग दर्ता भएको हो ।
उद्योगमा सुप्रब धितालसहितको लगानी रहेको छ । यो उद्योगले जग्गा व्यावस्थापन गरी वातावरण प्रभाव मूल्यांकनको प्रक्रिया अघि बढाइसकेको छ ।
यो कम्पनीले ५ सय ४ जनालाई रोजगारी दिने उल्लेख गरेको छ । यो उद्योगले २ करोड ८० लाख सेरामिक टायल उत्पादन गर्ने लक्ष्य लिएको छ । यो उद्योगका लागि १० हजार केभीएको प्रसारणलाइनको आवश्यक पर्नेछ ।
उद्योगमा कुल खर्च २ अर्ब ९६ करोड ७६ लाख खर्च गर्ने योजना छ । यो उद्योगले फिक्स क्यापिटल ३ अर्ब २१ करोड ४७ लाख रकम राखेको छ ।
यसैगरी ७५ करोड २८ लाख वर्किङ क्यापिटल राखेको छ । कम्पनीमा शतप्रतिशत स्थानीय लगानी छ । हाल सेरामिक टायल विभिन्न देशबाट आयात हुने गरेका छन् । उद्योगले आयात विस्थापन गर्ने उद्देश्य लिएको छ ।
उद्योग प्रस्ताव गरिएको वडाका वडा अध्यक्ष धर्मेन्द्र कुमार बनियाले उद्योगको काम धमाधम भइरहेको बताए । उद्योग सञ्चालनबाट स्थानीय उत्साहित रहेको र रोजगारी पाइने आशमा रहेको बनियाले जानकारी दिए ।
पालिकाका प्रबक्ता शुंधाशु शर्माले उद्योगको काम अन्तिम चरणमा पुगेको र सम्भवत जनवरी महिनाबाट सञ्चालन गर्ने योजनामा उद्योग तयारी रहेको बताए ।
