नेपालगञ्ज : नेकपा एमालेको लुम्बिनी प्रदेश अधिवेशनको तयारी अन्तिम चरणमा पुगेको एमालेले जनाएको छ । नयाँ नेतृत्व चयन गर्ने पहिलो अधिवेशन भएकोले यसलाई महत्वका साथ हेरिएको छ ।
अधिवेशनका लागि एक सय नौ पालिकाबाट एक हजार चारजना प्रतिनिधि छनोट भएका प्रतिनिधि चयन भएको नेकपा एमालेकी सचिव एवं लुम्बिनी प्रदेश इन्चार्ज पद्मा अर्यालले जानकारी दिइन् ।
प्रतिनिधितर्फ मनोनीत गर्नेबाहेक छनोटको काम सकिएको र मनोनितका बारे निष्कर्षमा पुग्न बाँकी रहेको उनले बताइन् । उनका अनुसार छनोट भएका प्रतिनिधिमा महिला ३० प्रतिशत, उत्पीडित जातिबाट १५ प्रतिशत र युवाबाट २० प्रतिशतभन्दा बढी प्रतिनिधि छनोट भएका छन् ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
एमालेले १६ र १७ भदौमा बुटवलमा लुम्बिनी प्रदेशको प्रथम अधिवेशन गर्दै छ । यो अधिवेशनबाट दुई सय पाँचजनाको प्रदेश कमिटीको चयन हुनेछ । यसअघि केन्द्रबाटै बनेको कमिटीमा ६ सय एकजना छन् ।
एमालेले प्रदेशका १२ जिल्लाबाट प्रतिजिल्ला पाँचजनाका दरले ६० जना, संघीय निर्वाचन क्षेत्रबाट प्रतिक्षेत्र पाँचजनाका दरले २६ बाट एक सय ३० जना र खुलाबाट पाँच पदाधिकारीसहित १५ जना रहने गरी दुई सय पाँचजनाको प्रदेश कमिटी चयन हुने सचिव अर्यालले जानकारी दिइन् ।
प्रदेश प्रचार विभाग प्रमुख डिआर घिमिरेले पहिलो र ऐतिहासिक अधिवेशन भएकाले यस अधिवेशनले विशेष महत्व राख्ने धारणा राखे ।