नेपालगञ्ज : बाँकेमा नारिकताको प्रमाणपत्र बनाउनेभन्दा राहदानी बनाउनेको सङ्ख्या धेरै पाइएको छ । जिल्ला प्रशासन कार्यालय बाँकेका सहायक प्रमुख जिल्ला अधिकारी टोपेन्द्र केसीका अनुसार गत आर्थिक बर्ष २०७९–८० मा १२ हजार ८६ जनाले राहदानी बनाएका छन् ।
यसरी राहदानी बनाउनेमा तीन हजार ४३१ जनाले द्रुत सेवा सिफारिसमार्फत र आठ हजार ६५५ जनाले सामान्य प्रक्रियाबाट गरी राहदानी प्राप्त गर्नुभएको छ । प्रशासनको तथ्याङ्कअनुसार सोही अवधीमा नौ हजार ९६२ जनाले बंशज, बैबाहिक, अङ्गीकृत र जन्मको आधारमा नेपाली नागरिकका सन्तानले वंशज नागरिकता प्राप्त गरेका छन् ।
सहायक प्रमुख जिल्ला अधिकारी केसीले भने, ‘पछिल्लो दिनमा विदेशी मुलुकमा अध्ययनका लागि जाने विद्यार्थीको सङ्ख्या समेत बढेको छ ।’ राहदानी बापत प्रशासनले गत आवमा चार करोड ५७ लाख ७२ हजार ५०० रुपैयाँ राजश्व सङ्कलन गरेको जनाएको छ ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
यसैगरी राष्ट्रिय परिचयपत्रका लागि वडा वडामा टोली परिचालन भएपछि यसबर्ष नागरिकताको प्रतिलिपी बनाउनेका सङ्ख्या पनि बढेको छ । गत आवमा १२ हजार ९७८ जनाले नागरिकताको प्रतिलिपी बनाएका छन् । नबुझिने, झुत्रो भएको नागरिकता राष्ट्रिय परिचय पत्रका लागि नयाँ बनाउनुपरेको सेवाग्राहीको भनाइ छ ।
प्रशासनका अनुसार आर्थिक बर्ष २०७८–७९ मा १३ हजार ५०० ले नागरिकता प्राप्त गरेकोमा पाँच हजार ५३२ जनाले मात्रै राहदानी प्राप्त गरेका थिए । यसैगरी सात हजार ७२५ जनाले नागरिकताको प्रतिलिपी लिएका थिए ।
पछिल्लो समय रोजगारीका लागि तथा अध्ययनका लागि जाने विद्यार्थीको सङ्ख्या बढेपछि राहदानी बनाउनेका सङ्ख्या पनि बढेको प्रशासनले जनाएको छ ।