नेपालगञ्ज : बर्दियाको बारबर्दिया नगरपालिकालाई सदरमुकाम गुलरिया जोड्ने बबई नदीको जब्दीघाट पुल सम्पन्न नहुँदै भत्कियो । पप्पु कन्ट्रक्शनले बनाएको यो पुल २०७४ सालमै भत्किएपछि बारबर्दियाका जनताले सदरमुकाम पुग्न सास्ती खेपिरहेका छन् ।
अहिले जब्दीघाटमा डुंगा सञ्चालन गर्न अनुमति पाएका ठेकेदारले काठको पुल हालेका छन्, जहाँ एक जना मान्छे तरेको दश रुपैयाँ लाग्छ । साइकल र मान्छे तर्दा २० रुपैयाँ लाग्छ । मोटरसाइकलमा एक जनाको २५ रुपैयाँ र दुई जनाको ३५ रुपैयाँ लाग्छ। अटोरिक्सा तारेको ५० रुपैयाँ लिने गरिन्छ ।
बारबर्दियाको मुख्य बजार जयनगरबाट जिल्लाको सदरमुकाम गुलरिया जानका लागि गाडीको बाटो छैन । जयनगर–गुलरियाको १३ किलोमिटर दूरीलाई पार गर्न गाडी चालकलाई बाँसगढी नगरपालिका वा मधुवन भएर जानुपर्छ ।
जब्दीघाटको पुल भाँसिएपछि यसले देशभर चर्चा पाएको थियो । यही जब्दीघाट पुलमुनि नेपाली कांग्रेसका सांसद सञ्जय गौतमले शनिबार बेलुकादेखि आमरण अनसन थालेका छन् । बर्दिया क्षेत्र नं. १ बाट बामदेव गौतमलाई हराएर चर्चामा आएका सञ्जय गएको चुनावमा यही क्षेत्रबाट निर्वाचित भए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
चुनावको बेलामा गौतमले एक महिनाभित्र जब्दीघाटमा वैकल्पिक बाटोको व्यवस्था गर्ने प्रतिबद्धता गरेका थिए । उनले बेलिब्रिजको कुरा गरेका थिए । अहिलेसम्म यो पूरा भएन । गौतमले सदनमा जब्दीघाट पुलको कुरा उठाएका पनि हुन्, जसको सुनुवाइ भएन ।
सांसद गौतमले सदन र सडकबाट माग उठाए पनि पूरा नभएपछि बाध्य भएर आमरण अनसनमा बसेको बताएका छन् । गौतमले विभिन्न १५ बुँदे माग अघि सारेका छन् । त्यसको एक नम्बर बुँदामा जब्दीघाट पुलकै कुरा छ, जहाँ उनी अनसन बसिरहेका छन् ।
गौतमले तटबन्ध, सिँचाइ, विगतका बाढीपीडितलाई राहत, मूर्तिहा नाका सञ्चालन, बेमौसमी बाढीले क्षति व्यहोरेका किसानलाई राहत, मल–बीउ, भ्रष्टाचारीलाई कारबाहीलगायतका माग अघि सारेका छन् ।
एकथरीले भने चुनावका बेलामा आफैंले गरेको वाचा पूरा नभएपछि गौतमले अनसनको नाटक गरेको आरोप लगाएका छन् ।