नेपालगञ्ज : रुपन्देहीको बुटवलस्थित एक होटलमा एक जोडी मृत फेला परेका छन् । तिनाउ पारी फूलबारीचोकमा रहेको कारिकोट होटलको कोठामा रहस्यमय रूपमा एक जोडी मृत फेला परेको इलाका प्रहरी कार्यालय बुटवलले जनाएको छ ।
कार्यालयका डीएसपी ठगबहादुर केसीका अनुसार धादिङ घर भएका अन्दाजी ३५ वर्षका सिताराम भुजेल र नाम–ठेगाना स्पष्ट नखुलेकी अन्दाजी २५ वर्षीया युवती मृत फेला परेका हुन् ।
भुजेल धादिङको कुमपुर–५ का बासिन्दा रहेको र युवतीको नाम पुष्पा भनिए पनि थर र घरको पूरा ठेगाना खुल्न नसकेको प्रहरीले जनाएको छ ।
उनीहरू सुतेको कोठाको तन्ना र टावेलमा रगत लतपतिएको देखिएको छ । सितारामले युवतीको हत्या गरी आफूले आत्माहत्या गरेको हुनसक्ने प्रारम्भिक अनुसन्धानले देखाएको र थप कुरा अनुसन्धानबाट खुल्ने डीएसपी केसीले बताए ।
उनका अनुसार उनीहरू आइतबार राति त्यस होटलमा बस्न आएका थिए । उनीहरूको शव पोष्टमार्टमका लागि लुम्बिनी प्रादेशिक अस्पतालमा पठाइएको र घटनाको अनुसन्धान भइरहेको प्रहरीले जनाएको छ ।
