नेपालगञ्ज : कालिकोटबाट सुर्खेतका लागि छुटेको बस दुर्घटना हुँदा ४ जनाको मृत्यु भएको छ भने १७ जना गम्भीर घाइते भएका छन् । म १ ख ६६० नम्बरको बस दैलेखको आठबीस नगरपालिका वडा नम्बर १ सिस्ने नजिक बुधवार राती दुर्घटना हुँदा ४ जनाको मृत्यु भएको छ । बस सडकबाट झण्डै ५० मिटर तल कर्णाली नदीको छेउमा खस्दा सो दुर्घटना भएको हो ।
दुर्घटनामा ज्यान गुमाउनेमा दैलेखको दुल्लु नगरपालिका–९ पदुकाका ३५ वर्षीय काशीराम पाण्डे, ३० वर्षीय धीरेन्द्र सुनार, कालिकोट पलाँता गाउँपालिका – ३ का ३३ वर्षीय ज्ञानबहादुर बम र पलाँता गाउँपालिका ३ कै ३२ वर्षीया धनकला शाही रहेका जिल्ला प्रहरी कार्यालय दैलेखले जनाएको छ ।
दुर्घटनामा गम्भीर घाइते १७ जनालाई राति नै उपचारका लागि सुर्खेत पठाइएको छ । दुर्घटनामा सामान्य घाइते भएकाहरूको स्थानीय स्वास्थ्य संस्थामा उपचार भइरहेको बताएको छ ।
बस चालक सुरेन्द्र डाँगी क्षेत्रीलाई प्रहरीले पक्राउ गरिएको जिल्ला प्रहरी कार्यालय दैलेखका सूचना अधिकारी प्रहरी निरीक्षक नरेश विकले जानकारी दिएका छन् ।
