नेपालगञ्ज : बर्दियाको गुलरिया नगरपालिका वडा नं. ८ स्थित भादा नदीले बगाउँदा मृत्यु भएकी महिलाको पहिचान खुलेको छ । उनी बाँकेको कोहलपुर नगरपालिका वडा नं. १२ चपौगौडीकी ५८ वर्षीया कर्णसिला शाही रहेको जिल्ला प्रहरी कार्यालय बर्दियाले जनाएको छ ।
शाहीलाई शुक्रबार भादा नदीले बगाइरहेको समयमा प्रहरीले उद्धार गरी बर्दिया अस्पताल गुलरिया लगिएकोमा उपचारका क्रममा मृत्यु भएको थियो । उनको परिचय खुल्न नसकेपछि प्रहरीले शाहीको तस्बिर सार्वजनिक गरेको थियो ।
उनको पहिचान खुलेको र शनिवार विहान ११ बजे शवलाई श्रीमान प्रेम शाहीको जिम्मा लगाइएको बर्दिया प्रहरीले जानकारी दिएको छ ।
