नेपालगञ्ज : पुस्तक तथा स्टेशनरी व्यवसायीहरुले नेपालगञ्जस्थित भेरी अस्पताल परिसरमा रहेको अन्जनी माता रसोइ घरलाई खाद्यान्न सहयोग गरेका छन् ।
पुस्तक तथा स्टेशनरी व्यवसायीहरुको छाता संगठन नेपाल पुस्तक तथा स्टेशनरी व्यवसायी महासंघ बाँकेले बिरामी तथा बिरामीका कुरुवाहरुलाई सस्तो मुल्यमा खाना खुवाउँदै आएको रसोइ घरलाई खाद्यान्न सहयोग गरेको हो ।
नेपालगञ्ज उपमहानगरपालिकाकी उप–प्रमुख उमा थापामगरको उपस्थितिमा खाद्यान्न हस्तान्तरण गरिएको थियो । खाद्यान्नहरुमा २ सय किलो चामल, २५ किलो दाल, एक कार्टुन तेल, २५ किलो पिठो, ५ किलो नुन र ५० किलो आलु प्रदान गरिएको महासंघ बाँके शाखाकी सचिव मिना डाँगीले जानकारी दिइन् ।
अन्जली माता रसोइ घरले बिहानको खाना २० रुपैयाँ र साँझको खाना ८० रुपैयाँमा खुवाउँने गरेको छ ।
यस्तै महासंघ बाँकेले जिल्ला प्रहरी कार्यालय बाँकेलाई स्वास्थ्य साम्रगी प्रदान गरेको थियो । बाँकेका प्रहरी प्रमुख ओम बहादुर रानालाई ४ हजार थान मास्क, ५ सय एम एलको सेनिटाइजर १० थान र ५ लिटरको सेनिटाइजर ३ थान प्रदान गरिएको छ ।
