सदरलाइनडटकम,
नेपालगञ्ज : कर्णाली प्रदेशका सामाजिक विकास मन्त्री दलबहादुर रावलले विज्ञान र प्रविधिको माध्यमबाट मात्रै समग्र राष्ट्रको उन्नती सम्भव भएको बताएका छन् । उनले मंगलबार नेपाल विज्ञान तथा प्रविधि प्रज्ञा प्रतिष्ठानद्वारा नवप्रवर्तन प्रणाली सुचकाङक र प्रयासहरु सम्बन्धी परामर्श गोष्ठीलाई सम्बोधन गर्दै यस्तो बताएका हुन् ।
सो गोष्ठीमा बोल्दै मन्त्री रावलले नीतिगत तहमा यसको आवश्यकता महसुश नगरिएसम्म नेपालमा विज्ञान र प्रविधिको विकास सम्भव नभएको बताए् । ‘आजसम्म अनुसन्धान गरिने थलोलाई राजनीति गर्ने थलो बनाईयो अवको समयमा यस्ता क्षेत्रमा राजनीति नगरिकन सबै एक भएर अघि बढ्न जरुरी छ । अनि मात्र विकास संभव हुन्छ’–उनले भने ।
विज्ञान र प्रविधिको विकासका लागि कर्णाली प्रदेशको सधै साथ र सहयोग रहने प्रतिबद्वता जनाउदै मन्त्री रावलले अब सबै मिलेर देश निर्माण गर्ने बाटोमा लाग्न आवश्यक रहेको औल्याए । उनले दक्ष र प्राविधिक जनशक्ति बाहिरिने परिपाटीको अन्त्य गर्न राज्यले ठोस कदम चालने बताए ।
नेपाल विज्ञान तथा प्रविधि प्रज्ञा प्रतिष्ठानले गरेको सो गोष्ठीमा राष्ट्रिय नवप्रवर्तन सूचकाङको परिचय एवं अन्तराष्ट्रिय एवं राष्ट्रिय स्थितीबारे नास्टका सहप्राज्ञ डा. जगतकमार श्रेष्ठ, समृद्धिका लागि नवप्रवर्तनको आवश्यकता र नेपालमा भएका प्रयासबारे प्रा. डा. भक्तबहादुर आलेले प्रस्तुतिकरण गरेका थिए ।
यस्तै उर्जा क्षेत्रमा नवप्रवर्तनबारे नास्टका इन्जिनियर रोशन पाण्डे र नास्ट कै डा. रविन्द्रप्रसाद ढकालले समृद्धिका लागि नवप्रवर्तन एवं नास्टको प्रयासबारे प्रतुति गरेको कार्यक्रममा प्रदेश नं. ५, कर्णाली प्रदेश र सुदूरपश्चिम प्रदेशका विभिन्न क्षेत्रमा अनुसंन्धानमा लागेका अनुसंन्धानकर्ता तथा विज्ञानका शिक्षक, बिद्यार्थी प्राध्यापक लगायतको सहभागिता रहेको थियो ।
