सदरलाइनडटकम,
जानकी (बाँके) : बाँकेको जानकी गाउँपालिकाका वडा नं. ६ गनापुरलाई शनिवार साक्षर वडा घोषणा गरिएको छ । १ हजार १ सय १७ जना निरक्षर रहेकोमा साक्षरता कक्षा सञ्चालन गरेर १ हजार ६१ जना साक्षर भएपछि गनापुरलाई आज साक्षर वडा घोषणा गरिएको गाउँपालिका शिक्षा शाखा संयोजक खगेन्द्र मल्लले जानकारी दिए ।
मल्लले वडा नं. ६ का अध्यक्ष सुरेश यादवलाई साक्षरताको प्रमाणपत्र प्रदान गरी साक्षर वडा घोषणा गरिएको बताए । गाउँपालिकालाई पनि साक्षर घोषणा गर्ने अभियानअन्तर्गत जानकीका ३ वटा वडालाई साक्षर वडा घोषणा गरिएको उनले बताए । जनतामा साक्षरताको अवस्था सुधार्दै गाउँपालिकालाई असार मसान्तभित्रै साक्षरता घोषणा गर्ने तयारीका साथ काम अघि बढेको मल्लको भनाई छ ।
वडा नं. ६ का अध्यक्ष सुरेश यादवले वडालाई पूर्णसाक्षर बनाउन गाउँपालिकासँग सहकार्य गरेर सशक्तरुपमा योजनासहित लाग्ने प्रतिवद्धता जनाए । उनले वडाका ९५ प्रतिशत व्यक्ति साक्षर भईसकेकोले अव सबै नागरिकलाई साक्षर बनाउन अभियान सञ्चालन गर्नुुपर्नेमा जोड दिए । यसैबीच जानकी गाउँपालिकाको वडा नं. ३ इन्द्रपुरलाई आईतवार साक्षर वडा घोषणा गर्ने तयारी भएको शिक्षा शाखा संयोजक मल्लले जानकारी दिए ।
जानकीलाई साक्षर गाउँपालिका घोषणा गरिँदै
७ असार २०७६, शनिबार १८:४८
