सदरलाइनडटकम,
खजुरा (बाँके) : खजुरा गाउँपालिकाले ब्यक्तिगत घट्ना दर्ता तथा सामाजिक सुरक्षा भत्ता वितरण अनलाईनमार्फत गर्ने भएको छ । आठ वटै वडामा अनलाईन मार्फत घट्ना दर्ता बिलिङ गर्ने प्रक्रिया अघि बढाईएको हो ।
सबै वडामा अनलाईन सेवा सञ्चालनका लागि इण्टरनेट जडान, कर्मचारीलाई तालिमलगायतको प्रकृया अगाडी बढाईएको गाउँपालिकाले जनाएको छ । सोही बारेमा कर्मचारीका लागि शुक्रवारदेखि खजुरामा तालिम शुरु भएको छ ।
५ दिने तालिममा गाउँपालिका आइटी अफिसर सुरेश साहु, कार्यालय सहायक राजेन्द्र कुमार वर्मा र सन्तोषी बिष्टले सहभागी सचिव खरिदारलाई ब्यावहारिक तथा सैद्धान्तिक ज्ञान सिकाईरहेका छन् । हाल वडा नं .१ देखि ४ सम्म इण्टरनेट जडान भईसकेको छ ।
उद्घाटन सत्रमा बोल्दै गाउँपालिका प्रमुख किस्मतकुमार कक्षपतिले २१औं शताब्दीमा समय सुहाउँदो अनलाईनमार्फत कामकाज हुने बताए । उनले अनलाईन सेवाले सेवाग्राहीको काम अझ प्रभावकारी हुने बिश्वास ब्यक्त गरे ।
गाउँपालिका उपप्रमुख एकमाया बिकले अनलाईन सेवाले हिजोका दिनमा जस्तो नाम छुट्ने, दोहोरिने समस्या हट्नुका साथै काममा पारदर्शिता हुने बताईन । कार्यक्रममा खजुरा गाउँपालिका निमित्त प्रमुख अधिकृत दिलबहादुर पौडेलले अनलाईन सेवाले सुरक्षा र समयको बचत हुने जिकिर गरे ।
उनले सञ्चारको युगमा सरकारको नीतिअनुरुपनै गाउँपालिकाले अनलाईन अभिलेखिकरण सेवा सञ्चालन गर्न लागेको जानकारी दिए ।
