नेपालगञ्ज : राप्ती नदीमा जल सतह शनिबार साँझ ७ बजेसम्म खताराको बिन्दु भन्दा धेरै माथि पुग्दा बाँकेका दर्जनौ गाउ डुवानको जोखिममा परेका छन । नदी किनारका गाउमा उच्च सर्तकता अपनाउन आग्रह गरिएको छ ।
लगातारको वर्षातको कारण राप्तीसोनारी गाउँपालिका–१ कुसुमस्थित बाढी मापन केन्द्रमा शनिबार बिहान १०ः३० बजे ५ दशमलव ७५ मिटर रेकर्ड गरिएकोमा साँझ ७ बजे नदीको सतह ८ मिटर १० सेन्टिमिटर पुगेको गेजरिडर भद्रबहादुर थापाले जानकारी दिए ।
उनका अनुसार यो बढ्दो क्रममा रहेको छ । नदीको सतह झन् झन् बढ्दै गएपछि राप्तीको तल्लो तटिय क्षेत्रका स्थानीय बासिन्दा जोखिममा परेका छन् ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
राप्ती सोनारी गाउँपालिका वडा नम्बर १का बाघखोर, चपरगौरी, चुनाह, सिक्टा डुवानमा परेको र त्यहाँका स्थानीयलाई सुररक्षित स्थानमा सार्ने तयारी भई रहेको वडा अध्यक्ष यामबहादुर खड्काले जानकारी दिए ।
यसैगरी सो बढीले डुडुवाको वडानं १ चौफेरीका गाउँमा बाढी पसेर केही घरमा क्षति पुर्याएपछि उनीहरुलाई सुरक्षति स्थानमा सार्ने काम भएको बाँकेका प्रमुख जिल्ला अधिकारी खगेन्द्र प्रसाद रिजालले जानकारी दिए । उहाँले राप्तीसोनारीका केही र डुडुवाका ५० परिवारलाई सुरक्षित स्थानमा सारिएको र डुडुवाका थप १०० परिवारलाई सार्ने तयारी गरिएको बताए ।
राप्तीनदीमा पानीको सतह ह्वात्तै बढेपछि सिक्टा सिचाई आयोजनाले बाँकेको अगैयास्थित ब्यारेजका १८ वटा ढोका सबै ढोका खोलिएका छन् ।
यसैबीच प्रमुख जिल्ला अधिकारीको नेतृत्वमा जिल्ला सुरक्षा निकाय, विपद व्यवस्थापन टिमले राप्ती नदीको कारण हुने संभावित खतराको निराकरण गर्नका लागि बाढी प्रभावित क्षेत्रको अवलोकन समेत गरेका छन् । बाँकेमा बाढी र डुवानको कारण समाचार तयार पार्दासम्म कुनै मानविय चौपाय क्षति भएको छैन ।