नेपालगञ्ज : नेपाल कम्युनिष्ट पार्टी एकीकृत समाजवादी (एस) बाँकेले दुई महिने संगठन विस्तार अभियान सञ्चालन गर्ने भएको छ । जेठमा हुने आफ्नो १०औं महाधिवेशनलाई लक्षित गर्दै संगठन विस्तार अभियान सञ्चालन गर्ने भएको हो ।
नेकपा एकीकृत समाजवादी बाँकेको पूर्ण बैठकले बाँकेका सबै स्थानीय तह र ८१ वडामा मुख्य अभियन्ता तोकी फागुन २२ देखि ३० गतेभित्र पालिका कमिटी, वडा कमिटी, जनवर्गीय संगठन गठन, पुनर्गठन, अद्यावधिक गर्ने, सदस्यता वितरण गर्ने लगायतका निर्णय गरेको छ ।
पूर्ण वैठकलाई लुम्बिनी प्रदेश इन्चार्ज तथा पार्टी केन्द्रीय सचिव हरि पराजुली, प्रदेश अध्यक्ष तथा पोलिटव्युरो सदस्य सोम प्रसाद पाण्डे, केन्द्रीय सदस्य तथा लुम्बिनी प्रदेश सचिव अशोक कोइराला, केन्द्रीय सदस्य अव्दुल हुसेन खाँ लगायतले सम्वोधन गरेका थिए ।
