नेपालगञ्ज : खाद्य प्रविधि तथा गुण नियन्त्रण कार्यालय नेपालगञ्जले जनशक्तिको अभावको कारण लक्ष अनुसारको प्रगति गर्न कठिन हुने गरेको बताईएको छ । शुक्रबार नेपालगञ्जमा आयोजित दोस्रो चौमासिक समिक्षा कार्यक्रमका अवसरमा कार्यालय प्रमुख अमित भुषण सुमनले सो कुरा बताएका हुन ।
उनले मन्त्रालयको अत्यन्तै कम प्राथामिकतामा रहेको आफ्नो कार्यालय अन्तरगत एक डिभिजनल कार्यालय सहित ६ वटा जिल्लाका लागि ९ जना जनशक्तिले खाद्य अनुज्ञापत्र जारी गर्नु, बजार अनुगमन, सेम्पल संकलन गर्नु, लगायतका कार्यसम्पादन गर्नु आफुहरुको बाध्यता रहेको सो अवसरमा उनले बताए ।
खाद्य प्रविधि तथा गुण नियन्त्रण कार्यालय नेपालगञ्जका खाद्य निरिक्षक एकराज बुढाथोकीले सहिजकरण गरेको सो कार्यक्रममा, डिभिजन कार्यालय दाङ्गका उज्ज्वल रायमाझी र नेपालगञ्ज कार्यालयका खाद्यय निरिक्षक रामहरी लामिछानेले आफ्नो कार्यालयबाट सम्पादन भएको कार्य प्रगति बारे प्रस्तुत गरेका थिए । सबै प्रस्तुतीमा अत्यन्तै सिमित कर्मचारी र साधनको अभावमा काम गर्नु परेको बाध्यता प्रस्तुत गरिएको थियो ।
खाद्य प्रविधि तथा गुण नियन्त्रण कार्यालय नेपालगञ्जले आर्थिक बर्ष २०८०–८१ मा चालु र पुँजीगत गरि २ करोड ४४ लाख १० हजार बजेट मध्ये ८९ प्रतिशत खर्च गरेको छ ।
कार्यक्रममा बाणिज्य कार्यालय बाँकेका विष्णु प्रसाद धिताल, पशु तथा भेटनरी अस्पताल नेपालगञ्जका प्रमु्ख कमला अधिकधारी, उपभोक्ता हित संरक्षण मञ्चका प्रभात कुमार ठकुरीलगायतले आ–आफ्नो सुझाव दिएका थिए ।
