नेपालगञ्ज : बाँकेको खजुरास्थित सुशील कोइराला प्रखर क्यान्सर अस्पताल आठ बर्षअघि सरकारलाई हन्तान्तरण गरिएको भए पनि हालसम्म दरबन्दी कायम हुन सकेको छैन ।
सरकारलाई हस्तान्तरण गरी हाल सङ्घीय सरकार मातहत रहेको यो अस्पतालमा एकजना पनि दरबन्दी कायम हुन नसक्दा उपचार सेवा प्रभावित भइरहेको अस्पताल विकास समितिका अध्यक्ष टेकेन्द्र मल्लले जानकारी दिए ।
हाल अस्पतालमा अस्थायी, करार र ज्यालादारीका गरी ११५ जना चिकित्सक तथा स्वास्थ्यकर्मी र अन्य कर्मचारी कार्यरत छन् । जसमध्ये १५ जना विशेषज्ञ चिकित्सक कार्यरत रहनुभएको छ । अस्पतालका निर्देशक समेत काजमा खटाइने गरिएको अध्यक्ष मल्लले बताए ।
अध्यक्ष मल्लले भने, ‘चिकित्सक तथा अन्य कर्मचारीको दरबन्दी कायम नहुँदा सेवा प्रवाहमा जलिटता हुनेगरेको छ, दरबन्दी अभावमा पनि स्तरीय उपचार सेवा दिने प्रयास गरिरहेका छौं ।’
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
दरबन्दी स्वीकृतिकै लागि अहिले पनि अस्पतालका निर्देशक डा. निरज भट्टराई स्वास्थ्य तथा जनसङ्ख्या मन्त्रालयमा धाइरहेको अस्पतालले जनाएको छ । अस्पतालले कम्तिमा ४०९ चिकित्सक, स्वास्थ्यकर्मी र अन्य कर्मचारी आवश्यक पर्ने भन्दै आन्तरिक सङ्गठनात्मक तथा ब्यवस्थापन (ओएनएम) सर्भे स्वीकृतीका लागि मन्त्रालयमा पठाएको लामो समय बिते पनि हालसम्म स्वीकृत हुन सकेको छैन ।
४०९ जना जनशक्तिको खाँचो रहेको बताइएको छ । कम्तिमा २०० दरबन्दी स्वीकृति भएमा अस्पताल सञ्चालनमा केही सहजता हुने अस्पताल विकास समितिले जनाएको छ । विशिष्टकृट अस्पताल भए पनि दरबन्दी स्वीकृती नहुँदा समस्या परिरहेको अस्पतालले जनाएको छ ।
खजुराबासीले २०६३ मा महायज्ञ सञ्चालन गरी क्यान्सर अस्पताल निर्माण शुरु गरेपछि नेपाल सरकारले भौतिक पूर्वाधार निर्माणका लागि सहयोग गरेको थियो । कोभिड–१९ सङ्क्रमणको समयमा पहिलो पटक यस अस्पताललाई कोभिड अस्पतालको रुपमा प्रयोग गरिएको थियो ।