कञ्चनपुर : भारतमा कोरोना संक्रमण फैलिदाँ त्यसको असर नेपालमा पनि देखिने खतरा बढेको छ । भारतबाट काम गरेर फर्केका १० जना ब्यक्तीमा कोरोना संक्रमण पुष्टि भएको हो ।
कञ्चनपुरको गौरीफन्टा नाकामा रहेको हेल्थ डेस्कमा जाँच गर्दा १० जनामा कोरोना भाइरसको संक्रमण पुष्टी भएको हेल्थ डेस्कका प्रमुख गणेश साउदले जानकारी दिए । भारतमा नयाँ भेरिएन्ट जेएन वान देखिन थालेपछि नेपाल–भारत सीमा नाकामा कोरोना परीक्षण अनिवार्य गरिएको छ । ‘अहिलेसम्म १० जनामा एन्टिजेन पोजेटिभ देखिएको छ,’ साउदले भने ।
हेल्थ डेस्कका प्रमुख साउदका अनुसार कोरोना संक्रमितलाई घरमै एकान्तबास (होम आइसोलेसन) मा बस्न सुझाव दिइएको छ । गौरीफन्टा नाका भएर भारतका विभिन्न स्थानबाट दैनिक सयौँ नेपाली घर फर्किरहेका छन् ।
