नेपालगञ्ज : संयुक्त बजार अनुगमन समितिले बाँकेका दुई ठुला ग्यास उद्योगमा गरेको अनुगमनबाट ठुलो मात्रामा म्याद सकिएका ग्यास सिलिण्डर फेला पारेको छ ।
अनुगमन समितिले शुक्रबार जिल्लाको मनकामना ग्यास उद्योग र भेरी ग्यास उद्योगमा अनुगमन गरेर प्रयोगमा ल्याउन नसकिने अवस्थाका धेरै संख्यामा ग्यास सिलिण्डर फेला पारेको हो ।
अनुगमनले बाँकेमा पनि दुर्घटना निम्त्यिाउन सक्ने अवस्थाका धेरै संख्याका ग्यास सिलिण्डर बजारमा छ्याप छ्याप्ती रहेको हुन सक्ने आशंका उत्पन्न गरेको छ ।
समितिले मनकामना ग्यास उद्योगबाट म्याद समाप्त भएका, लिकेज, बिग्रेका, कुच्चिएका, जोखिमयुक्त रहेका र तत्काल म्याद सकिन लागेका ग्यास सिलिण्डर फेला परेको बाणिज्य आपूर्ति तथा उपभोक्ता संरक्षण कार्यालय नेपालगञ्जका सूचना अधिकृत देवीलाल चौलागाईले जानकारी दिए ।
उनका अनुसार मनकामना ग्यास उद्योगमा म्याद समाप्त भएका १ सय ६० ग्यास सिलिन्डर, लिकेज, बिग्रेका, कुच्चिएका, जोखिमयुक्त ५० र तत्काल म्याद सकिन लागेका करिब ५० वटा ग्यास सिलिन्डर गरि जम्मा २ सय १० ग्यास सिलिन्डरलाई बिक्री वितरण नगर्न निर्देशन दिएको छ ।
साथै मनकामनामा लिकेज जाँच गर्ने मेसिनको प्रयोग नै नगरी ग्यास सिलिण्डर बजारमा पठाउने गरेकोले ग्यास लिकेज टेष्टिङ्ग मेशिनलाई यथाशीघ्र प्रयोगमा ल्याउन समेत निर्देशन दिएको छ ।
यस्तै भेरी ग्यास उद्योगमा रहेका म्याद सकिएका करिब ३ हजार ग्यास सिलिन्डर, लिकेज भएका, कुच्चिएका र बिग्रेका करिब २ हजार ५ सय वटा ग्यास सिलिन्डर र म्याद सकिन लागेका २ सय वटा ग्यास सिलिन्डरलाई बिक्री वितरण नगर्न निर्देशन दिएको अनुगमनमा सहभागि उपभोक्ता संरक्षण कार्यालयका सूचना अधिकृत चौलागाईले जानकारी दिए । कार्यालयले व्यवसायी जिम्मेवार बन्नुनका साथै उपभोक्ता सचेत बन्न आग्रह समेत गरेको छ ।
