नेपालगञ्ज : नेपालगञ्ज औद्योगिक क्षेत्र उद्योग विकास संघ आन्दोलनमा उत्रिएको छ । औद्योगिक क्षेत्रभित्र रहेका उद्योगहरुले चर्चेको जग्गाको अस्वाभाविक एवम् एकतर्फीरुपमा गरिएको भाडावृद्धिको बिरोधमा संघ आन्दोलनमा उत्रिएको छ ।
संघले अस्वाभाविक एवम् एकतर्फीरुपमा गरिएको भाडावृद्धिको बिरोधमा नेपालगन्ज औद्योगिक क्षेत्र व्यवस्थापन कार्यालयमा तालाबन्दी गरेको छ । संघका अध्यक्ष किरण कुमार कार्कीले एकतर्फीरुपमा गरिएको भाडावृद्धि तत्काल फिर्ता लिन माग गरे ।
भाडावृद्धिको बिषयमा आफुहरुले पटकपटक ध्यानाकर्षण गराउँदा पनि सुनुवाई नभएपछि बाध्य भएर आन्दोलनमा उत्रनु परेको उनको भनाइ छ ।
२०७५ सालमा वृद्धि भएको भाडादर अनुसार असुलीका लागि २०७९ साउन १ गते लागु हुने गरी अर्को परिपत्र जारी गरिएपछि संघ रुष्ट भएको हो । चार वर्षअघि बढेको भाडा घटाउनु पर्छ भनेर दवाव दिइरहेका बेला त्यही भाडादर कार्यान्वयन गराउन अर्को पत्र थपिएपछि कडाइका साथ प्रतिबाद गर्नु पर्ने अवस्था आएको अध्यक्ष कार्कीको भनाइ छ ।
