बर्दिया : कर्तव्य ज्यान मुद्दामा तीस वर्ष कैद सजाय पाएका एक अभियुक्तलाई बर्दिया प्रहरीले करिब ६ वर्षपछि पक्राउ गरेको छ । ०७२ फागुन ५ गते राति ठाकुरबाबा नगरपालिका—८ का ६९ वर्षीयजोरे थापालाई घरमै सुतिरहेको अवस्थामा हत्या गरिएको थियो ।
घटनाको अर्कोदिन प्रहरीले हत्याका अभियोगमा सोही ठाउँका २४ वर्षीय टोपे भन्ने अजिब बुढा क्षेत्रीलाई पक्राउ गरेको थियो ।व्यक्तिगत रिसइबीले हत्या गरिएको बुढाक्षेत्रीलाई प्रहरीले नियन्त्रणमा लिई कर्तव्य ज्यान मुद्दा चलाएको थियो ।
अनुसन्धान प्रक्रिया सकिएपछि ०७२ साल फागुन ३० गते जिल्ला अदालतमा पुराएको थियो । शौच गर्ने बहानामा अदालतबाट हतकडीसहित फरार बुढाक्षेत्रीलाई सोमबार पक्राउ गरिएको जिल्ला प्रहरी कार्यालयका सूचना अधिकारी एवं डिएसपी हिक्मतबहादुर बोहोराले बताए ।
अदालतले उनलाई कर्तव्य ज्यान मुद्दामा १९ वर्ष ११ महिना ६ दिन कैदको सजाय गरेको थियो । थुनुवा भागे भगाएकोमा थप साढे १० वर्ष कैदसहित ३० वर्ष कैद सजाय अदालतले गरेको डिएसपी बोहोराले जनाए ।
जिल्ला अदालतको आदेशले उनलाई कैद भुक्तानका लागि कारागार पठाइएको प्रहरीले जनाएको छ । हत्याका अभियुक्त लुकीछिपी भारतमा बस्दै आएकोमा घर आएको समय प्रहरीले पक्राउ गरेको हो ।
