नेपालगञ्ज : पश्चिम नेपालको अवध क्षेत्र मानिने बाँके र बर्दियामा सदियौंदेखिको अवधी संस्कृति, भाषा र साहित्यको संरक्षण र सम्वर्धनमा विशेष पहल गर्नुपर्नेमा अगुवाहरुले जोड दिएका छन् ।
यहाँ आयोजना गरिएको अवधि सांस्कृतिक प्रतिष्ठान नेपाल नेपालगञ्जको तेस्रो अधिबेशनको अवसरमा मन्तव्य राख्ने अधिकांश अवधिभाषि अगुवाले अवधी संस्कृति, भाषा र साहित्यको उचित संरक्षण नहुँदा लोप हुने अवस्थामा पुगेको चिन्ता व्यक्त गर्दै संरक्षणमा जोड दिएका हुन् ।
वरिष्ठ अवधी साहित्यकार रामगोपाल गुप्ताले अवधि संस्कृति र साहित्यको संरक्षणमा निजीक्षेत्र र सरकारले विशेष ध्यान दिनुपर्ने बताए ।
यसैगरी अवधी पत्रकार संघ नेपालका केन्द्रीय अध्यक्ष राकेशकुमार मिश्रले नेपालमा अवधी भाषा र साहित्यको विकासको उपलब्धी र अवधी क्षेत्रको विकासका लागि केन्द्र, प्रदेश र स्थानीय सरकारको ध्यानाकर्षण गराए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
कार्यक्रममा वरिष्ठ साहित्यकार पूर्व प्राज्ञ सनत रेग्मी, महेन्द्र पुस्तकालयका सदस्य कृष्णमुरारीप्रसाद भट्ट, अधिबक्ता विश्वजीत तिवारी, साहित्यकार मधइसिंह सिख्ख, सब्बीर रहीमानीलगायतले अवधी भाषा, साहित्य र कला क्षेत्रको विकासका लागि अवधी क्षेत्रका लोकगीत, कथा कहानीलाई संकलन गरी अभिलेखीकरण गर्नुपर्नेमा जोड दिए ।
प्रतिष्ठानको तेस्रो अधिवेसनले रमेशचन्द्र कुमालको अध्यक्षतामा नयाँ कार्यसमिति चयन गरेको छ । समितिमा मधईसिंह सिख्ख, वीरेन्द्र यादव, कृष्णा पाठक, जहिरुल हक जीनु, चन्दा सिंह, अल्पना बैश्य, नीलम शर्मा, सतीश पाठक, नितेष विश्वकर्मा, सुशीला बैश्यलाई सर्वसम्मत चयन गरिएको छ ।
सर्वसम्मत रुपमा चयन भएको समितिको बैठकले विभिन्न पदाधिकारी चयन गर्ने प्रतिष्ठानका सस्थापक विष्णुलाल कुमालले बताए । सो अवसरमा साहित्यकारहरु मधईसिंह सिख्ख, सब्बीर रहीमानी र नितेश विश्वकर्मा विभिन्न रचनाहरु प्रस्तुत गरेको प्रतिष्ठानका सदस्य जहिरुल हक जीनुले बताए ।