नरैनापुर (बाँके) : बाँकेको नरैनापुर गाउँपालिकामा खाद्य संकट शुरु भएको छ । खाद्य संकट शुरु भएसँगै अधिकांश स्थानीय चिन्तित भएका छन् । बर्षेनि करिब ६० क्विन्टल धान उत्पादन गर्ने नरैनापुर ४ का इसराफिल खानको घरमा अहिले एक किलो पनि धान छैन । ६० क्विन्टल धान मध्ये परिवारका लागि खान पुग्ने राखेर बाँकी सबै बिक्री गर्दै आएका उनले यस वर्ष के खाने भन्ने चिन्ताले सताउन शुरु गरेको बताए ।
यसैगरी नरैनापुर–४ का सरिफ खानको खेतमा पनि अहिले कुनै बाली छैन । धान उत्पादन शून्य भएपछि अहिले खानको परिवारमा खाद्य संकट शुरु भएको छ । घरमा खाने चामल नभएर समस्या भइरहेको उनले बताए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
खान जस्तै नरैनापुरका जलिल मनिहारको पनि खेत यो वर्ष समयमा वर्षा नहुँदा बाँझै बन्यो । उनले बोरिङको पानीले थोरै रोपाइँ गर्नुभयो तर, बेमौसमको भीषण वर्षाले सबै सखाप पार्यो । मनिहारको प्रमुख आर्थिक स्रोत नै खेती भए पनि धान एक दाना नहुँदा अहिले उनको परिवारमा पनि खाद्य संकट शुरु भइसकेको छ ।
लगातार दुई वर्ष उत्पादन नहुँदा खाद्य सङ्कटको सामना गर्नुपर्ने बाध्यता सो क्षेत्रका अधिकांश बासिन्दालाई आइपरेको छ । बाँकेको दुर्गम भनेर चिनिने नरैनापुरमा यो वर्ष ९५ प्रतिशत खेतीयोग्य जमिन बाँझै छ ।