नेपालगञ्ज : बर्दियाको गुलरिया नगरपालिकामा खेतीयोग्य जमिनमध्ये करिव ४० प्रतिशत जमिनमा भटमास खेती शुरु भएको छ । धान र मकै खेतीबाट लगानी अनुसारको प्रतिफल नहुने भएपछि किसानहरु भटमास खेती तर्फ आकर्षित भएका हुन् ।
कम मेहनत र थोरै लगानीमा भने अनुसारको प्रतिफल मिल्ने भएपछि किसानहरुले भटमास खेतीको क्षेत्रफल बढाएका हुन् । कोषेबाली अनुसन्धान केन्द्र खजुरा बाँकेको सहयोगमा किसानहरुले भटमास खेतीलाई अगाडि बढाएको बताएका छन् ।
त्यसका लागि केन्द्रले किसानलाई वीउविजन उपलब्ध गराउने गरेको कोषेबाली अनुसन्धान केन्द्र खजुरा बाँकेका प्रमुख राजेन्द्र दराइले बताउनुभयो । किसानले यसअघि ती खेतमा मकै, गहुँ, धानलगायतका बाली लगाउने गरेका थिए । मेहनत र लगानी अनुसारको प्रतिफल भने नपाउने गरेको किसानहरुले गुनासो सुनाउने गरेका थिए ।
![](https://sadarline.com/wp-content/uploads/2023/06/355735841_163168713323414_6806641009584846467_n.jpg)
![](https://sadarline.com/wp-content/uploads/2023/10/Ntc-add-1-.jpg)
धान, मकै र गहुँ खेती भन्दा भटमासले आम्दानी राम्रो दिएको र मेहनत पनि कम गर्नु परेको किसान रामचन्द्र यादवले बताए । कतिपय किसानले भारतबाट वीउ ल्याएर पनि भटमास खेती गरेका छन् ।
तर पहिलो वर्ष भएकाले उत्पादन के कस्तो हुन्छ भन्नेमा भने रामलाल यादव अन्यौलमा छन् । गुलरिया नगरपालिकाका करिव ९० प्रतिशत किसानले भटमास खेती गरेका छन् । सुरुवाती चरणमा भने उनीहरुलाई उचित परामर्शको खाँचो देखिएको छ ।