दैलेख : बलात्कार गरेको भन्दै उजुरी दिएकी एक २२ वर्षीया महिलाले बयान बदलेपछि जिल्ला अदालत दैलेखले उनलाई तीन महिना कैद र पाँच हजार रुपैयाँ जरिवाना तोकेको छ ।
प्रहरीमा दिएको उजुरीको बेहोरा विपरीत अदालतमा उजुरीकर्ता महिलाले बयान फेरेपछि जिल्ला न्यायाधीश दण्डपाणि लामिछानेको इजलासले उनलाई तीन महिना कैद र पाँच हजार जरिवाना तोकेको हो ।
महिलाले गाउँको रिसिबीका कारण उजुरी दिएको भन्दै अदालतमा बयान फेरेको जिल्ला अदालत दैलेखका सूचना अधिकारी टिकाराम न्यौपानेले बताए । राज्यका श्रोत, साधन, र जनशक्तिलाई अनुत्पादक काममा खर्च गराएको भन्दै उक्त सजाय गरिएको फैसलामा उल्लेख छ ।
बलात्कारको आरोप लागेका भगवतीमाई गाउँपालिका–५ का २३ वर्षीय दीपेन्द्र चन्दले सफाइ पाएका छन् । चन्द चार महिनादेखि जिल्ला कारागार दैलेखमा थुनामा रहेका थिए ।
