काठमाण्डौ : शुक्रवार बस्ने भनिएको संसद्को बैठक पनि स्थगित भएको छ । अमेरिकी सहयोग एमसीसी सम्झौतामाथि सैद्धान्तिक छलफल हुने भनिएको बैठक पर्सि आइतवारसम्मका लागि स्थगित गरिएको हो । बिहीवारका लागि तय भएको बैठक सरकारको आग्रहमा आजसम्मका लागि स्थगित भएको थियो ।
सभामुख अग्निप्रसाद सापकोटाले ध्वनि मतको सट्टा मत विभाजन प्रक्रियामा जान खोजेको भन्दै प्रधानमन्त्री शेरबहादुर देउवा सशङ्कित छन् । संसद्को प्रक्रियाअनुसार अघिल्लो हप्ता आइतवार संसदमा टेबल भएको एमसीसीमा अब सैद्धान्तिक छलफल हुन्छ । छलफलमा उठेका प्रश्नमा सरकारका मन्त्रीले जवाफ दिनेछन् । त्यसपछि सभामुखले सैद्धान्तिक स्वीकृतिका लागि निर्णयार्थ पेस गर्नुपर्छ ।
यसरी स्वीकृतिका लागि पेस गर्दा सामान्यतयाः ध्वनि मत गराउने चलन छ । संसदमा सत्तापक्षको बहुमत हुने भएकाले सैद्धान्तिक छलफलमा सरकारले पेस गरेका विषय सामान्यतयाः अस्वीकृत हुँदैन । तर एमसीसीको विपक्षमा रहेको माओवादी केन्द्रले सैद्धान्तिक छलफलमै मत विभाजन माग्ने तयारी गरेको प्रधानमन्त्रीको आशङ्का छ ।
प्रतिनिधि सभामा कायम सांसदको १० प्रतिशत अर्थात् २८ जनाले मत विभाजन मागेमा सभामुखले मत विभाजनमा जान सक्ने नियम छ । तर सत्तारुढ दलले सरकारले ल्याएको प्रस्तावमा यसरी मत विभाजन माग्न नमिल्ने भन्दै कांग्रेसले आपत्ति जनाउँदै आएको छ ।
