नेपालगञ्ज : सरकारी लगानीमा खरिद गरिएको डेढ करोड मूल्य बराबरको मेशिन नेपालगञ्ज भन्सार कार्यालय जमुनाहामा प्रयोगविहीन अवस्थामा रहेको छ ।
करिब ५ वर्षअघि खरिद गरी ल्याइएको ब्याग एक्सरे मेशिन सञ्चालनका लागि दक्ष जनशक्तिको अभावमा प्रयोगमा आउन नसकेको हो ।
सीमा सुरक्षाका लागि महँगोमा खरिद गरिएको सो मेशिन प्रयोगमा आउन नसक्दा सरकारको लगानी बालुवामा पानीझैं भएको छ । तर, नेपालगञ्ज भन्सार कार्यालयका प्रमुख जयबहादुर भण्डारीले भने भन्सारलाई प्रविधिमैंत्री बनाउन लागिएको बताए ।
यसको प्रयोगका लागि भन्सारले पनि अहिले खासै चासो देखाएको छैन। भन्सार कार्यालय जमुनाहा नाकाभन्दा टाढा र भित्र परेको हुँदा पनि मेशिन कार्यालय परिसरमा राख्नुको विकल्प देखिँदैन ।
नेपाल–भारत सीमामा दैनिक हजारौंको संख्यामा सर्वसाधारणको आवतजावत हुने गरेको छ । जमुनाहा नाकाबाट विभिन्न प्रकारका अवैध क्रियाकलाप हुने गरेता पनि त्यसका लागि भने कुनै सुरक्षात्मक प्रविधि नरहेको बताइएको छ ।
प्रहरी, भन्सार कार्यालयका कर्मचारी र सशस्त्र प्रहरीको नजरमा जे देखियो, त्यो नै सही वा गलत हुने गरेको स्थानीय बताउँछन् । जसले गर्दा समानका बीच भागमा लुकाइछिपाइ लगिने र अवैध सामान नेपाल भित्रिने गरेका छन् ।
भौतिक पूर्वाधारको अवस्था नाजुक रहेका कारण यहाँका भौतिक संरचना मर्मतदेखि निर्माणसम्मको काम भइरहेको भन्सार कर्मचारी बताउँछन् ।
