नेपालगञ्ज : बाँकेको कोहलपुरमा सोमवारदेखि निःशुल्क एन्टिजेन विधिमार्फत कोरोनाको जाँच शुरु भएको छ ।
कोहलपुर नगरपालिकाले विहान ११ बजेदेखि दिउँसो १ बजेसम्म लक्षण चिन्ह देखिएका र संक्रमितको सम्पर्कमा रहेका व्यक्तिहरुको निःशुल्क एन्टिजेन विधिमार्फत कोरोना जाँच गरेको हो ।
नगरपालिकाले हप्तामा सोमवार र विहीबार दुई दिन कोरोना जाँच गर्ने उपमेयर संजुकुमारी थारुले जानकारी दिइन् । कोरोना भाइरस महामारीको तेस्रो लहर फैलिएसँगै नेपालगन्ज र कोहलपुर हटस्पट बनेको छ । पहिलो र दोस्रो लहरमा पनि बाँके कोरोनाको हटस्पट बनेको थियो ।
पछिल्लो साता यता परीक्षण गरिएकामध्ये ६० प्रतिशत बढीमा भाइरस संक्रमण पोजेटिभ देखिरहेको जिल्ला कोभिड १९ व्यवस्थापन केन्द्रका फोकलपर्सन तेज वलीले जानकारी दिए । उनका अनुसार संक्रमित अधिकांश नेपालगञ्ज र कोहलपुर लगायत क्षेत्रका छन् ।
