बर्दिया : प्लान इन्टरनेसनल नेपालको सहयोगमा बर्दियामा सञ्चालन गरिएको ‘बालविवाह, कम उमेरमा गर्ने विवाह र जबरजस्ती गर्ने विवाह रोकथाम परियोजना’ अन्तर्गत बाल संरक्षणकालागि जिल्लास्तरीय नीतिगत सम्वाद कार्यक्रम सम्पन्न गरिएको छ ।
जिल्ला समन्वय समिति बर्दियाको आयोजना र बाँके युनेस्को क्लबको समन्वय तथा सहयोगमा बर्दियाको गुलरियामा बाल संरक्षणका लागि जिल्लास्तरीय नीतिगत सम्वाद कार्यक्रम सम्पन्न गरिएको हो ।
सो सम्वाद कार्यक्रमको अध्यक्षता गर्दै जिल्ला समन्वय समिति बर्दियाका प्रमुख शंकरप्रसाद थारुले जिल्लाका सबै स्थानीयतहमा बाल संरक्षण र सेवा प्रवाहका लागि नीतिगत विषयहरुमा छलफल गरेर कार्यान्वयन गर्नका लागि यो महत्वपुर्ण सम्वाद गरिएका बताए ।
उनले प्लान नेपाल र बाँके युनेस्को क्लबले बालविवाह रोकथाम र बालअधिकार तथा मानवबेचविखन विरुद्ध गरेका कार्यक्रमको जिल्लामा निकै सकारात्मक प्रभाव परिरहेको बताए ।
सो अवसरमा जिल्ला समन्वय समिति बर्दियाका उपप्रमुख मान बहादुर विष्टले बाल संरक्षण र सेवा प्रवाहका लागि स्थानीय तहले ठोस निति निर्माण गरेर कार्यान्वयन गर्नुपर्नेमा जोड दिए ।
सम्वाद कार्यक्रममा बाँसगढी नगरपालिकाका मेयर शालिकराम अधिकारी र बढैयातालका अध्यक्ष लालबहादुर श्रेष्ठले पनि बाल संरक्षण, बाल अधिकार र बालविवाह रोकथामका लागि आफुहरुले विभिन्न नीतिहरु बनाएको जानकारी गराएका थिए । कार्यक्रममा जिल्ला समन्वय समिति बर्दियाका समन्वय अधिकारी कृष्ण चापागाई र मधुवन, ठाकुरबाबा र बारबर्दिया नगरपालिकाका जनप्रतिनिधिहरुको पनि उल्लेख्य सहभागिता रहेको थियो ।
बाँके युनेस्को क्लबका प्रमुख संरक्षक प्रवेज अलि सिद्दीकीले क्लबले सञ्चालन गरेको परियोजनाबाट समुदायमा बाल अधिकार र बाल संरक्षणको चेतना जागृत हुनुका साथै वालविवाह रोकथाममा प्रभावकारी काम भएको बताए ।
सो सम्वाद कार्यक्रमबाट सहभागिहरुमा बर्दियाका सबै स्थानीयतहमा बाल संरक्षण र सेवा प्रवाहका लागि तयार गरिएका निति र नियमहरुको कार्यान्वयन गर्दै अगाडी बढ्नु पर्ने साझा धारणा बनेको ‘बालविवाह, कम उमेरमा गर्ने विवाह र जबरजस्ती गर्ने विवाह रोकथाम परियोजना’ का संयोजक बसन्त विसीले जानकारी दिए ।
