नेपालगञ्ज : कोरोना भाइरस संक्रमणबाट भेरी अस्पतालमा थप दुईजनाको मृत्यु भएको छ । नेपालगञ्ज र चन्दनाथका महिला र पुरुषको मृत्यु भएको जिल्ला कोभिड–१९ संकट केन्द्र बाँकेले जनाएको छ ।
नेपालगञ्ज उपमहानगरपालिका–१२ की ७२ वर्षीया महिलाको बुधवार दिउँसो मृत्यु भएको हो । स्वास्थ्यमा समस्या देखिएपछि असार ३ गते नेपालगञ्ज मेडिकल कलेज कोहलपुरमा उनको पीसीआर परीक्षण गर्दा रिपोर्ट पोजेटिभ आएको थियो ।
त्यसको भोलिपल्ट उनी भेरीको कोभिड वार्डमा भर्ना भएकी थिइन् । उनको उपचारका क्रममा दिउँसो १ः २० मा मृत्यु भएको हो । योसँगै बाँकेमा भाइरस संक्रमणबाट मृत्यु हुनेको संख्या ३ सय ११ पुगेको छ ।
असार ३ गते यता भाइरस संक्रमणबाट बाँकेका कसैको पनि मृत्यु भएको थिइएन् । त्यस्तै चन्दनाथ नगरपालिका १० जुम्लाकी ६८ वर्षीया महिलाको गएराती मृत्यु भएको हो । असार ९ गते भाइरस संक्रमण पुष्टि भएकी ति महिला १४ गते अस्पतालको कोभिड वार्डमा भर्ना भएकी थिइन् ।
स्वास्थ्यमा सुधार नआएपछि उनको उपचारकै क्रममा गएराती साढे ८ बजे मृत्यु भएको जिल्ला कोभिड–१९ संकट व्यवस्थापन केन्द्र बाँकेका फोकलपर्सन तेज वलीले जानकारी दिए । योसँगै उपचारका लागि बाँके आएका बाहिरी जिल्लाका मृत्यु हुने भाइरस संक्रमितको संख्या ३ सय ६२ पुगेको छ ।
