काठमाण्डौ : नेपालमा मनसुन प्रवेश गरेसँगै देशभर मौसम बदली रहेको छ । जल तथा मौसम विज्ञान विभागको मौसम पूर्वानुमान महाशाखाका अनुसार शनिबार बिहान देशभर आंशिकदेखि सामान्य बदली भई केही स्थानमा वर्षा भइरहेको छ ।
देशको पूर्वी र मध्य भू–भागमा उत्तर पश्चिम बंगालको खाडी र आसपास बनेको न्यून चापीय क्षेत्रको प्रभाव तथा पश्चिमी भू–भागमा पश्चिमी वायु र स्थानीय वायुको मिश्रित प्रभाव रहेको छ महाशाखाले जनाएको छ ।
मौसम पूर्वानुमान महाशाखाका अनुसार शनिबार दिउँसो देशभर मौसम बदली रहनेछ । धेरै स्थानमा चट्याङसहित वर्षाको सम्भावना रहेको छ । गण्डकी, लुम्बिनी र कर्णाली प्रदेशका केही स्थानमा भीषण वर्षाको सम्भावना छ ।
साँझ पनि देशभर मौसम बदली रहनेछ । देशका धेरै स्थानमा चट्याङसहित हल्कादेखि मध्यम वर्षाको सम्भावना रहेको छ । प्रदेश १, गण्डकी प्रदेश र लुम्बिनी प्रदेशका केही स्थानमा भीषण वर्षाको संभावना रहेको महाशाखाले जनाएको छ । भीषण वर्षा हुने क्षेत्रमा सतर्कता अपनाउन महाशाखाले आग्रह गरेको छ ।
