नेपालगञ्ज : नेपालगञ्ज मेडिकल कलेज शिक्षण अस्पतालमा आईसियू र भेन्टिलेटरसहितका उपकरण थप गरिएको छ । कोरोनावाहेक अन्य विरामीहरुको उपचारलाई दुष्टिगत गर्दै नेपालगञ्ज मेडिकल कलेज नेपालगञ्ज र कोहलपुरमा आईसियू, भेन्टिलेटरसहितको उपकरण थप गरिएको अस्पताल निर्देशक डा. एम. किदवाईले जानकारी दिए ।
यसअघि २६ बेड आईसियू र ७ बेड भेन्टिलेटर रहेको नेपालगन्ज शिक्षण अस्पतालमा २० वटा आईसियू बेड थपेर ४६ बेड पुर्याईको छ भने थप ७ वटा भेन्टिलेटर थपेर १४ पुर्याईएको छ ।
त्यसैगरी कोहलपुर मेडिकल कलेजमा ३२ वटा आईसियू बेड थप गरेर ५२ पुर्याएको छ । ४ वटा भेन्टिलेटर थप गरेर भेन्टिलेटरको संख्या १० पुर्याईएको छ । नेपालगञ्ज र कोहलपुरमा एकएक वटा पोटेबल अल्ट्रासाउण्ड मेशिन पनि थप गरिएको अस्पतालका सहायक निर्देशक नितेशकुमार कनोडियाले जानकारी दिए ।
आईसियू बेड संख्या र भेन्टिलेटर थपिएसंगै सिरियस बिरामीहरुलाई गुणस्तरीय उपचार सेवा प्रदान गर्न सहज हुने उनको विश्वास छ । थप गरिएको आईसियू वार्डको मंगलवार नेपालगञ्ज उपमहानगरपालिकाका मेयर डा. धवल शम्शेर राणा र बाँकेका प्रमुख जिल्ला अधिकारी रामबहादुर कुरुम्वाङले संयुक्तरुपमा उद्घाटन गरे ।
