नेपालगञ्ज : कोरोना संक्रमण अप्रत्याशित रुपमा बृद्धिभएपछि बाँकेमा जारी निषेधज्ञा आगामी जेठ ३ गतेसम्मका लागि थप गरिएको छ । जिल्ला प्रशासन कार्यालय बाँकेले कोरोना संक्रमण बृद्धिका कारण असहज बन्दै गईरहेको परिस्थितिलाई मध्येनजर गर्दै थप एक हप्ताका लागि निषेधाज्ञा जारी गरीएको जनाएको छ ।
संक्रमणको चेनब्रेक गर्न भन्दै निषेधाज्ञा जारी गरिए पनि संक्रमणले झनै भयावह रुप लिन थालेपछि निषेधाज्ञा जेठ ३ गतेसम्मका लागि थप गरिएको हो ।
बाँकेमा संक्रमण तिब्ररुपमा बढीरहेको कुरालाई गम्भीरता पुर्वक लिदै संक्रमण रोकथाम, नियन्त्रण र उपचार कार्यलाई प्रभावकारी बनाउन जेठ ३ गते राती १२ बजेसम्मका लागि निषेधाज्ञा थप गरिएको प्रमुख जिल्ला अधिकारी शिबराम गेलालले बताए ।
यसअघि बैशाख १३ गतेदेखि बाँकेमा एकहप्ताका लागि निषेधाज्ञा जारी गरेको थियो । संक्रमण नियन्त्रणमा नआएपछि हप्ता दिनको समय तोकेर तेस्रो पटक निषेधाज्ञा जारी गरिएको हो ।
