नेपालगञ्ज : बाँकेबाट सोमवार थप ३८ जना कोरोनामुक्त भइ डिस्चार्ज भएका छन् । जिल्ला कोभिड–१९ संकट व्यवस्थापन केन्द्र बाँकेका फोकल पर्सन नरेश श्रेष्ठका अनुसार सोमवार नेपालगञ्ज १२ का ९ महिने बालिकासहित १३ महिला र २५ पुरुष गरी ३८ जना कोरोनामुक्त भई डिस्चार्ज भएका हुन् ।
उनिहरुलाई असोज १२ गते कोरोना संक्रमण देखिएपछि विभिन्न आइसोलेसनमा राखिएको थियो । योसँगै बाँकेमा कोरोना संक्रमणबाट मुक्त भई डिस्चार्ज हुनेको संख्या १ हजार ८ सय ४७ पुगेको छ ।
विभिन्न आइसोलेसन केन्द्रमा अन्य जिल्लाका २१ सहित ५ सय ५३ जना सक्रिय संक्रमित उपचाररत छन् । बाँकेमा हालसम्म कोरोना संक्रमितको संख्या २ हजार ४ सय ५ रहेको छ भने २६ जनाको मृत्यु भईसकेको छ ।
