सदरलाइनडटकम,
नेपालगञ्ज : नेपालगञ्ज उपमहानगरपालिकाले चालु आर्थिक वर्षका योजनाको कार्यान्वयनका लागि सक्रीयता बढाएको छ । यहि चैत महिनाभित्र सबै योजनाहरु सम्पन्न गर्ने गरि योजना कार्यान्वयनका लागि सक्रीयता बढाइएको प्रमुख प्रशासकीय अधिकृत हरि प्याकुरेलले जानकारी दिए । नेपालगञ्जमा चालु आर्थिकवर्षमा वडास्तरीय योजना, स्थानीय पूर्वाधार विकास साझेदारी कार्यक्रम, तराई मधेस समृद्धि कार्यक्रम, प्रदेश र संघीय योजनाहरु कार्यान्वयनमा रहेका छन् ।
समयभित्रै सम्पूर्ण योजनाहरु गुणस्तरीय ढंगले निर्माण सम्पन्न गर्नका लागि उपमहानगरपालिकाले बरिष्ठ कार्यक्रम अधिकृत शरद पौडेलको नेतृत्वमा अनुगमन समिति वडा वडामा खटाएको छ । समितिले वडा नम्बर १, ४, ५, ६, १८ र २० नम्बर वडा कार्यालयमा पुगेर योजनाको कार्यान्वयनबारे जानकारी लिईसकेको छ । अनुगमन टोली केही दिनभित्रै सम्पूर्ण वडामा पुगेर निर्माण अवस्थाबारे जानकारी लिने छ ।
अनूगमनका क्रममा योजनाको हालको अवस्था, योजना सञ्चालनमा आईपरेका समस्याको सहिजकरण पनि टोलीले गर्दै आएको छ । उपमहानगरपालिकाले योजनाको शीघ्र कार्यान्वयनका लागि ओभरसियरलाई वडा कार्यालयमा खटाएको छ । ओभरसियर र प्राविधिकहरु योजनाको स्टिमेटमा सक्रिय भएर लागेका छन् ।
योजनाको स्टिमेट तयार भएका ठाउँमा उपभोक्ता समिति समेत गठन भईरहेको छ । नेपालगञ्ज उप–महानगरपालिका योजना शाखा प्रमुख इञ्जिनियर भुपेन्द्र बोहराले नेपालगञ्जमा हाल संघीय बाहेक करीब २५ करोडका चारसय बढि योजना कार्यान्वयनको चरणमा रहेको जानकारी दिए ।
योजना कार्यान्वयनका लागि उपमहानगरपालिकाले वडा कार्यालयलाई अझ बढि जिम्मेवार बनाउँदै लगेको जनाएको छ । चैतभित्र योजना कार्यान्वयनका लागि उपमहानगरपालिकाले निरन्तर अनुगमन गर्दै समस्या भएका स्थानमा तत्काल समाधानका लागि पहल गर्ने जनाएको छ ।
योजना कार्यान्वयनमा उपमहानगरको कडाई
२० मंसिर २०७६, शुक्रबार १८:४०
