सदरलाइनडटकम,
नेपालगञ्ज : नेपालगञ्जस्थित महेन्द्र बहुमुखी क्याम्पसमा क्रियाशील विद्यार्थी संगठनहरुले क्याम्पस प्रशासन समक्ष विभिन्न मागहरु राख्दै ध्यानाकर्षण गराएका छन् । चार विद्यार्थी संगठनहरुले संयुक्त प्रेस विज्ञप्ती जारी गरेर आफ्ना माग पूरा नगरिए चरणबद्ध आन्दोलन गर्ने चेतावनीसमेत दिएका छन् ।
संयुक्त विज्ञप्तिमार्फत् विद्यार्थी संगठनहरुले शैक्षिक क्यालेण्डरअनुसार नियमित पठनपाठनको व्यवस्था हुनुपर्ने, विभिन्न संकायअन्तर्गत कार्यक्रमहरुमा मनोमानी ढंगले शुल्क बृद्धि भएकाले बैज्ञानिक शुल्क निर्धारण गर्नुपर्ने, सेमेष्टेर कार्यक्रमहरुमा अपारदर्शी ढंगले वितरण गरिएका छात्रबृत्तिलाई खारेज गरी त्रिभुवन विश्व विद्यालयको नियम अनुसार पारदर्शी ढंगले वितरण गर्नुपर्ने, स्वतन्त्र विद्यार्थी युनियनको कोषको वितरण सार्वजनिक गर्नुपर्ने, सेमेष्टर कार्यक्रमहरुको आय ब्यय सार्वजनिक गर्नुपर्ने र कर्मचारी अभावका कारण विद्यार्थीहरुका नियमित कार्यक्रमहरु प्रभावित हुँदै आएकाले आवश्यक कर्मचारीको व्यवस्था गर्न माग गरेका छन् ।
क्याम्पक इकाईका अनेरास्ववियु सचिव प्रकाश विक, नेविसंघ अध्यक्ष चन्द्र प्रकाश देवकोटा, अखिल क्रान्तिकारीका उपाध्यक्ष ध्रुब जोशी र समाजवादी विद्यार्थी युनियनका प्रतिनिधि संगम पोख्रेलले संयुक्त विज्ञप्ती जारी गरेर क्याम्पस प्रशासनको ध्यानाकर्षण गराएका हुन् ।
विद्यार्थी संगठनद्वारा क्याम्पसमा शैक्षिक सुधारको माग
५ भाद्र २०७६, बिहीबार १६:०१
