सदरलाइनडटकम,
नेपालगञ्ज : प्रत्येक वर्ष झैं यस वर्षपनि नेपालगञ्जमा रामलीला मञ्चनको तयारी गरिएको छ । बडा दशैंका अवसरमा हुँदै आएको रामलीला महोत्सव १ सय ५१ औं वर्षमा प्रवेश गरेकोले रामलीला नाटक मञ्चनलाई भब्य, सभ्य र सफल बनाउन तयारी गरिएको हो ।
ऐतिहासिक तथा सांस्कृतिक महत्व बोकेको रामलीलालाई भव्य, सभ्य र सफल बनाउन विभिन्न तयारी गरिएकोे छ । नेपालगञ्जका बिभिन्न व्यक्तित्व सम्मिलित रामलीला सञ्चालक समितिले हरेक वर्ष शारदीय नवरात्रीमा ऐतिहासिक तथा सांस्कृतिक महत्व बोकेको रामलीला सञ्चालन गर्दै आएको छ ।
नेपालगञ्ज १३ बाँके बगियास्थित रामलीला मैदानमा असोज २४ देखि कार्तिक ३ गतेसम्म सञ्चालन हुने रामलीलाको सफलता र प्रभावकारिताका लागि परामर्शका सथै आवश्यक तयारी थालिएको छ । रामलीला सञ्चालक समितिका कार्यवाहक अध्यक्ष सन्तोषकुमार कनोडियाको अध्यक्षतामा बसेको वैठकले सरोकारवालासँग परामर्श गर्दै प्रचारप्रसारलाई तीव्रता दिनेलगायत निर्णय गरेको छ । करीव १५ लाख खर्चको अनुमान गरिएको रामलीला सञ्चालनका लागि भारतको बृन्दावनधामका प्रसिद्ध कलाकारले नाटक मञ्चन गर्ने समितिका कार्यवाहक अध्यक्ष कनोडियाले जानकारी बताए ।
रामलीला अवलोकनको सहज व्यवस्था र शान्ति सुरक्षाको उचित प्रवन्धमा विशेष जोड दिइएको समितिका महामन्त्री जगदिशप्रसाद वैश्यले जानकारी दिए । असोज २४ गते दिउँसो भव्य शोभा यात्रासँगै साँझ रामलीला प्रारम्भ हुने प्रचार मन्त्री बिष्णु कुमालले बताए । उनले रामलीलामा २८ गते धनुष यज्ञ, कार्तिक २ गते रावण वध र कार्तिक ३ गते भरत मिलाप तथा शुभ राज्याभिषेकलगायतका महत्वपूर्ण प्रस्तुती रहनेछन् । पहिलो पटक रामलीला सञ्चालनको ऐतिहासिकता, सांस्कृतिक महत्व केन्द्रित स्मारिका प्रकाशन गरिने प्रचार मन्त्री कुमालले बताए ।
यस वर्षपनि नेपालगञ्जमा रामलीला मञ्चन गरिने
३० भाद्र २०७५, शनिबार १३:२५
