सदरलाइनडटकम 
नेपालगन्ज : आईतबार रातीदेखि परेको अविरल वर्षाका कारण बाँकेको ‘कर्णाली’ नरैनापुर गाउँपालिकासंग सदरमुकाम नेपालगन्जको सडक सम्पर्क बिच्छेद भएको छ ।
सो गाउँपालिकाका अध्यक्ष इस्तियाक अहमद शाहले अविरल वर्षापछि नेपालगन्जबाट नरैनापुर आउने सडक पूरै अबरुद्ध भएको बताए । उनले हुलाकी सडक निर्माणका क्रममा भएको लापरबाही र पुल निर्माणको काममा ढिलाई साथै उचित डाइभर्सनको अभावमा आईतबार रातिदेखि नै आवतजावत ठप्प भएको जानकारी दिए ।
‘ठाउँ ठाउँमा पुल बनिरहेका छन् तर पुल बनाउनु अघि डाइभर्सन बनाउनु पर्ने मापदण्डलाई बेवास्ता गरिएकाले अहिले पानी परि रहँदा सडक पूरै सडक अवरुद्ध भएको छ,’ उनले आक्रोश पोख्दै भने–‘बर्षायाममा यस्तै अवस्था हुन्छ भनेर आफूले पहिल्यैदेखि नै हुलाकी सडक आयोजना प्रमुख, ठेकेदार र प्रमुख जिल्ला अधिकारीलाई सचेत गराउँदै आएको भएपनि सुनुवाई नहुँदा यो अवस्था आयो ।’
उनले बाटोको अभावको कारण नरैनापुरबासी मर्कामा परेको बताउदै भने–‘न भारततिर जान सक्ने अवस्था छ, न नेपालगन्ज आउने अवस्था छ, म त २ नम्बर वडामा रहेको मेरो घरबाट ४ नम्बरमा रहेको गाउँपालिका कार्यालय पनि जान सकिरहेको छैन ।’ उनले सोमबार घरबाट गाउपालिका जानको लागि ९ किलोमिटर पैदल हिडेर गएको बताए ।
बाँकेको ‘कर्णाली’ नरैनापुरको नेपालगन्जसंग सडक सम्पर्क बिच्छेद भयो
१९ असार २०७५, मंगलवार १३:११
