विजयसिंह भारती/सदरलाइनडटकम
१७ साउन, प्यूठान :सडक सञ्जाल पूर्णरुपमा ठप्प हुँदा यहाँका बाढी पहिरो पीडितहरुसम्म राहत पुग्न सकेको छैन् । बाढी र पहिरोका कारण एक सातादेखि विस्थापितहरु विद्यालय, सामुदायिक भवन तथा छिमेककोमा आश्रय लिइरहेका छन् । जिल्लाभर गरी १ सय ८६ घर पूर्ण रुपमा क्षति भएको छ । ८ सय २५ जना विस्थापित छन् ।
जिल्लाका विभिन्न सामाजिक संघ संगठनहरुले राहत संकलन गरिरहेको भए पनि बाटोको कारण त्यसलाई पीडितसम्म पु¥याउन कठिन भएको हो । शनिवार डोजरको प्रयोग गरेर बाटो खुलाउँदै फोप्लीका विस्थापितसम्म लगिएको केहि राहत सामाग्री माझकोट–५ खोलीगाँऊमा रोकिएको होटल व्यवसायी संघ प्यूठानका अध्यक्ष चन्द्रलाल न्यौपानेले बताए ।
‘बाटो खुलाउन निक्कै कठिन भयो’ राहत रोकिएको जानकारी दिँदै उनले भने, ‘पीडितसम्म पु¥याउन गाविस सचिवलाई हस्तान्तरण गर्ने प्रयास गरेका छौं ।’ राहत सामाग्री वितरणको व्यवस्था मिलाउन गाविसले ४ वटा उपसमिति समेत गठन गरेको छ । राहत सामाग्री रोकिएको ठाँऊबाट पीडितसम्म पुग्न चार घण्टा पैदल 
हिड्नु पर्ने स्थानीय विनोद भण्डारीले जनाए ।
गैर सरकारी संस्था महासंघ जिल्ला शाखा प्यूठानले ४० घरपरिवारका लागि चामल, चाउचाउ, नुन, तेल संकलन गरेको छ । त्यस्तै स्थानीय फुलवारी एकीकृत ग्रामीण विकास संस्था र कारितास नेपालले ५७ परिवारका लागि खाद्यान्न सामाग्री संकलन गरेको छ । संकलित सामाग्री पीडितसम्म पु¥याउन नसकिएको गैसस महासंघका जिल्ला अध्यक्ष रमेशकुमार श्रेष्ठले बताए । गैससमा कार्यरत कर्मचारीहरुले दुई दिनको पारिश्रमिक बराबरको रकम सहयोग उठाइरहेका छन् । संकलित राहत सामाग्री पीडितसम्म पु¥याउनु राज्यको दायित्व भएको कांग्रेस प्यूठानका सचिव देवेन्द्र बर्माले बताए । ‘राज्यले गर्नुपर्ने काम नागरिकले गरेका छन् ।’ ,उनले भने, ‘सरकारी तवरबाट सहयोग भएको पाँइदैन ।’
नेपाली सेनाद्वारा राहत वितरण
पीडितहरुका लागि नेपाली सेनाले हेलिकप्टर मार्फत राहत वितरण गरेको छ । पहिरोबाट आफन्त गुमाएका, बिस्थापित र उच्च जोखिममा रहेका ९४ पहिवारलाई राहत वितरण गरिएको गोरख बक्स गणका गणपति प्रमुख सेनानी हरीशबहादुर बमले जानकारी दिए । नेपाली सेना, सैनिक श्रीमती संघ, रोटरी क्लवको सहयोगमा चामल, दाल, कम्बल, स्वास्थ्य सामाग्री, फिल्टर, घरायसी औजार लगायतका सामाग्री प्रदान गरिएको छ ।
‘विप्लप’ माओवादीका युवा प्रभावित क्षेत्रमा
नेत्रविक्रम चन्द विप्लप नेतृत्वको नेकपा माओवादी निकट युवा संगठन राष्ट्रिय युवा जनस्वयंमसेवकका १० जना युवाहरु आइतबार पहिरो प्रभावित क्षेत्र फोप्लीका लागि प्रस्थान गरेका छन् । पीडितहरुको भएको क्षेत्रमा सरसफाई र खानेपानीको क्षेत्रमा स्वयंसेवक परिचालन गरिने संगठनका जिल्ला अध्यक्ष हरि बस्नेतले बताए ।
आफन्त गुमाएका परिवारलाई नगद सहयोग
बाढि तथा पहिरोमा परि ज्यान गुमाएकाहरुको परिवारका लागि जिल्ला दैवि प्रकोप उद्धार समिति मार्फत ५ हजार र जिल्ला विकास समिति मार्फत ३ हजारका दरले ३९ जनालाई राहत रकम प्रदान गरिएको सहायक प्रमुख जिल्ला अधिकारी भुपबहादुर पुनले बताए । काठमाण्डौं निवासी दुर्गाकुमारी कार्कीले जिल्ला प्रहरी कार्यालय मार्फत आफन्त गुमाएका परिवारहरुलाई १० हजारका दरले ३ लाख ९० हजार रुपैयाँ वितरण गरिएको कार्यालयले जनाएको छ ।
प्यूठानभर बाढी र पहिरोमा पुरीएर ३९ जनाले ज्यान गुमाएका छन् भने एक जना अझै बेपत्ता छन् । मृत्यु हुनेमा १० पुरुष, १४ महिला, ८ बाल र ७ बालबालिका रहेका छन् । बाढि र पहिरोका कारण ७ जना घाइते भएका छन् ।
