नेपालगञ्ज : गत बुधवार राती हावाहुरीसँगै आएको पानीले बाँकेमा भित्र्याउने बेलाको गहुँ, जौ, मसुरोलगायतका कृषिजन्य बालीमा ठूलो क्षति पुर्याएको छ । बाँकेको सबै स्थानीय तहमा कृषिजन्य बालीमा क्षति पुर्याएको हो ।
सबैभन्दा धेरै असर पाकी सकेको गहुँ, जौ, तरकारीमा परेको डुडुवा गाउँपालिकाका कृषि शाखा प्रमुख सुशील शर्माले बताए । यद्यपी क्षतिको यथार्थ विवरण आउन बाँकी रहेको उनले जानकारी दिए ।
बाली पाकेर घर भित्र्याउने समयमै पानी परेपछि कृषकहरू चिन्तित बनेका छन् । डुडुवा गाउँपालिका वडा नं. ६ का किसान जयपाल मौर्यले भने, ‘ अब के खाने? छोराछोरीलाई कसरी पाल्ने ?’ पानीले कृषिबालीमा पुर्याएको क्षतिको असरले किसानहरू भोकमरीको चिन्तामा परेका छन् ।
बेमौसमी वर्षातले पाकीसकेको गँहु, मसुरोलगायतका अन्नबालीमा ठुलो क्षति पुर्याएको डुडुवा गाउँपालिका वडा नं. ६ वडाध्यक्ष मोहनराम मिश्रले बताए । उनले भने,‘डुडुवा ६ मो काँक्रा, भिण्डीलगायतका तरकारी बालीमा समेत क्षति पुगेको छ ।’
