नेपालगञ्ज : भारतीय प्रहरीले ठुलो परिमाणको चरेशसहित नेपालगञ्जको सीमावर्ती भारतीय बजार रुपईडिहामा एक नेपाली महिलालाई नियन्त्रणमा लिएको छ । रुकुमको काँक्रे निवासी ३५ वर्षीया रेखा बुढालाई ५ किलो चरेशसहित पक्राउ गरेको भारतीय प्रहरीले जनाएको छ ।
रुपईडिहास्थित एसएसबी ४२औं वाहिनीका नि.जीडी सत्येन्द्रकुमार सिँह नेतृत्वको टोली र रुपईडिहा थानका इञ्चार्ज शमशेरबहादुर सिँहको नेतृत्वमा रहेको टोलीले संयुक्तरुपमा जाँच गर्दा बुढाको साथबाट सो परिमाणको चरेश फेला परेको हो ।
उक्त चरेशको अन्तर्राष्ट्रिय बजारमा करिब डेढ करोड मूल्य रहेको भारतीय प्रहरीले जनाएको छ । पक्राउ परेकी बुढालाई आवश्यक कारवाहीका लागि जिल्ला अदालत बहराइच पठाईएको भारतीय प्रहरीले जनाएको छ ।
